Shillong: Ka Sieng Riti Institute, Wahkhen kan kynjoh sha ka 25 snem kynthih ha ka jingiaid lynti jongka ban pynim, pynkhlain bad hikai ia ki jinghikai ki longshwa manshwa ne ka riti dustur.
Kane ka shlem ka ieng kum ka nongmuna ban ai ka jingstad jinghikai khamtam ha ka put ka tem tynrai, ka siaw ka rwai, ka shad ka kmen tynrai, ka riam ka beit bad ka akot ka burom.
Kumba ju long man u snem, mynta u snem kan maramot ia ka iing kaba la sator khamtam ka jingsap u tynrew. Ha kane ka taiew, kane ka shlem ka la pyllong ia ka jingphiang tynrew ban tap biang ia ka iing ia kaba rim, ha kaba la wan ban iarap lem ki paralok ki parajor kiba ieid ba thoin bad kiba don ka mynsiem.
Uwei na ki nonghikai ka Sieng Riti Institute, u bah Phriasman Majaw ula iathuh ba kane ka ka Sieng Riti kan sa kynjoh shen sha ka 25 snem kynthih ha ka jingiaid lynti jongka ban pynim ban pynkhlain ia ka jinghikai ki longshwa manshwa wat hapdeng ka jingtynjuh kaba shyrkhei.
Haduh mynta ka Sieng Riti Institute, kam pat ioh ka jingiarap na ka sorkar na ka bynta ban pynbiang ia ki jingdonkam hynrei ka la iaid bad tyllun lyngba ka jingnoh synniang ki paralok ki dkhot khamtam hapoh ka jingialam u bah Komik Khongjirem bad kiwei.
Na ka liang u bah Phriasman ula kyntu ia ki paidbah kiba don ka mynsiem ba lada ki kwah ban noh synniang, ka Sieng Riti Institute, ka pdiang sngewbha lada dei kaba rit ne kaba heh ruh kampher hynrei kaba kongsan ka dei ka jingkhraw bad ka jingieid lyngba ka jingkitkhlieh.
Ka Sieng Riti ka don ha ka shnong Wahkhen jong ka Pynursla Konstitwensi ka Hima Khyrim Syiemship.
Phiang tynrew ban maramot ia ka Sieng Riti, la jan kynjoh sha ka 25 snem khlem ka jingiarap na ka sorkar
