Shillong: Phi la dei lypa u nongjop, wat duh wat rit mynsiem, la ai mynsiem u myntri ka tnad ialehkai ka jylla u bah Wailadmiki Shylla ia ki nongialehkai kiba duna dkhot.
U myntri ka tnad ialehkai ka jylla ula iadon bynta ban ai mynsiem ia ki nongialehkai ba duna dkhot met shwa ba kin mih ban leit iashim bynta sha ka lympung 23rd Senior, 18th Junior bad 2nd Sub Junior National Powerlifting Championship 2026 kaban long ha Dehradun, Uttarakhand naduh ka 16 tarik haduh 18 tarik mynta u bnai. Ka jingkitbok ka la long ha hall ka Bethany Society, Laitumkhrah Shillong.
Ki don 8 ngut kiban leit iashim bynta kynthup kynthei bad shynrang hapoh ka lama ka Meghalaya State Paralympics Association (MSPA).
U bah Wailad ula ong ba lashem snem ka jylla kan sa pdiang ia ka lympung National games bad kan dei ka rynsan kaba khraw ia ki samla kiba donsap ha ka jingialehkai.
Shi bynta halor kane, u myntri ula ong ba ka sorkar ka la thaw ruh ia ka polisi ba kito kiba wanrah takma na ka lympung national, Asian game bad international kin ioh rung kam beit sak ha ka kam sorkar khlem da donkam ban ialeh eksamin shuh.
Kiba don lang ha kane ka jingialang kitbok ki long u Adviser ka sorkar jylla bad ka MSPA bah Himalaya Shangpliang, kong Brigettee Warshong ka Deputy Director ka Commissioner of Persons with Disabilities, u bah Shaiborlang Lyngdoh u President ka MSPA, bad u bah Denis Lynrah, u Rick Rynthel u director ka Bethany Society nalor kiwei pat.
Haba iakren bad ki nongialehkai, kila pynpaw ka jingkmen ban ioh ia kum kane lad ban leit iashim bynta shabar bad kila kyrmen ba kin lah ban wanrah ia ka nam bad ka burom.
Kawei ka kmie jong kiba duna dkhot, ka la pynpaw ia ka jingsngewnguh ia ka sorkar jylla bad ia ka seng kaba la ialam lynti ia ki khun jongka ban ioh ia kum kane ka lad namar ba ha ka jingpyrkhat jongka, ki khun kiba duna dkhot kim lah leh eiei hynrei ka long pynban da kumwei.