Shillong: Ka Trinamool Congress ka la long kaba la pynkhreh na bynta ban iakhun ha ka ilekshon MDC sha Garo Hills Autonomous District Council (GHADC).
Haba kren sha ki lad pathai khubor hynne ka sngi u MLA ka TMC u Dr Mukul Sangma ula ong ba ka party ka la long kaba pynkhreh ban iakhun ia kane ka ielkshon sha GHADC bad la khmih lynti ba ka sorkar kan pynbna noh mardor ia kane ka ilekshon.
Ula ong ba ka party ka ladep khot aplekeshon ia ki kyrtong kiba don ka jingthrang ban iakhun ia ka ilekhshon MDC.
U Dr. Mukul ula ong ba ka party kan shong bishar bha ia u kyrtong ha shwa ba kan pyniakhun namar ba ka kyndon jong ka 10th Schedule jong ka riti synshar ka ri kam treikam ha ka District Council.
Halor ka jingbymtreikam bha ka GHADC ha kine ki khyndiat snem, u Dr. Mukul ula ong ba kumno ka GHADC kan treikam bha haba ki nongtrei kim shym la ioh tulop haduh 43-44 bnai bad kane kam pat ju jia ha ka histori jong ka jylla.
Ula ong ba ha ka sorkar ba ialam ma u mynshwa, ka sorkar kam ju mushlia ia ka EC ha ki District Council namar ba ki burom ia ka synshar paidbah.
Ula bynrap ba ka ladei ka por ba ki paidbah kidei ban jied bha ia ki nongmihkhmat ban pynbha bad wanrah biang ia ka burom jong ki ADC.
Ula kynthoh ruh ia kane ka sorkar bad ka party kaba don ha ka bor halor ka jingbym shimkhia haba iadei bad ki jingeh ki ADC.
Halor ka jingkhynra ka Enforcement Directorate ia ka ophis IPAC ha Kolkatta, u Dr Mukul ula ong ba ka TMC ha jylla Meghalaya hadien u 2023 ka la rai ba kam don jingiadei bad ka IPAC namar ba ka party ka kwah ban ngam jylliew bad shaniah ha ki nongtrei ka party.
Pynkhreh iadur ka TMC ia ka NPP sha ka elekshon MDC ha GHADC
