Shillong: Ia u Bah Chaltbha Muksor, u rangbah na Lad Rymbai, East Jaiñtia Hills ba jah rngai la katto katne sngi, la lap biang ka Khasi Students’ Union (KSU) Bengaluru Unit ha ka sngi Thohdieng.
Une u rangbah u don mynta hapoh ka jingpeit jong ka seng ha ka jingshah sumar ha hospital ha katei ka jylla.
U Chaltbha uba la mih na la shnong ha ka 2 tarik Kyllalyngkot 2026, ban leit wad kam sha Bengaluru, ula jah rngai ha shiteng lynti bad ki bahaiing ruh kim ioh shuh ban phone ia u hadien bala iakren khatduh ha Jolarpettai Junction Railway Station, Tamil Nadu, ha ka 5 tarik Kyllalyngkot 2026.
Ka KSU Bengaluru Unit hadien ba la pyntip da ka KSU West Jaiñtia Hills Unit bad ka longïing jong u Chaltbha, ka la sdang ïa ka jingwad da kaba pynphriang ïa ki poster, ki dur bad ki jingpynbna paidbah lyngba ki social media.
Katkum ka kyrwoh na u samla Donboklang Nongphud u President ka KSU Bengaluru unit, ka seng ka la ioh jingtip na ki pulit ka Krishnagiri Police Station kiba la pyntip ba kila lap ia u bah Chaltbha Muksor ba u la mynsaw bad u la shah sumar ha Government Medical College and Hospital, Krishnagiri.
Halor kane, ka seng ka la leit sha Krishnagiri ban pynthikna ia ka jingshngain bad jingbha jingmiat jong u bah Chaltbha.
U Chaltbha uba la mynsaw na bynta ki kjat bad mynta u don hapoh ka jingsumar jong ka KSU Bengaluru Unit. Ka seng ka pynpaw ka jingsngewnguh ïa ki pulit jong ka Krishnagiri Police Station, ki bor pynïaid jong ka Hospital, bad ki riew shimet kiba la noh synñiang ha ka jingjop ban wad sei ïa u.
Lap ia u samla ba jah ba la mynsaw jur ka kjat ha Tamil Nadu
