Shillong: U President ka USA u Donald Trump ula buh thong ban kurup ia ka Greenland, kaba hap bad peit ka ri Denmark kaba la kyntait ia kane ka jingthmu u Trump.
Ka jingthmu u Trump ban kurup ia kane ka dewlynnong ka la pynbitar ia ka ri Denmark, kaba dei ruh ka dkhot ka North Atlantic Treaty Organization (NATO) ha kaba ka USA ruh ka dei ka dkhot.
Lada ka USA ka iaid shakhmat ban kurup ia ka Greenland, kan sa mih ka thma wat hapdeng ki ri Europe kiba iadon lang ha ka NATO.
Ka USA ka kwah ban kurup ia ka Greenland na ka bynta ban shna ktem na ka bynta ka jingiada bad ka jingshngain ka ri.
Ka Greenland ka dei ka dew lynnong kaba heh tam ha ka pyrthei, kaba don hapdeng ka North Atlantic bad ka Arctic Ocean kaba la synshar hi hapoh ka hima Syiem ka ri Denmark ha kaba ki nongshong shnong ki dei kiba hiar pateng na Denmark.
Ha kane ka dew lynnong, ki synshar hi hynrei ka Denmark ka pyniaid tang ia ka pisa bad ka kam iada ri. Ki briew ki im na ki kam ri bad khwai dohkha bad ki marpoh khyndew ha kane ka dew lynnong. Ka don ruh u marpoh khyndew kum u uranium, rare earth.
Ka USA ka kwah ban kuru pia kane ka dewlynnong namar ba ka iajan bad ka North America bad ka Russia.
Ha kawei ka liang, ka Russia ka la byrngem ia ka USA ba lada ka jam sa shi jam palat ia u pud, ka Russia kan ym shu peit shuh hynrei kan pyni lang da ki kam. Kane ka long hadien ba ka USA ka la leit kurup ia ka jhad umphniang kaba sieh lama ka Russia ha duriaw North Atlantic.
Ka Russia ka la kiew jinging halor kane ka jingleh ka USA ha kaba ka la kynnoh ba ka dei ka jingpynkhein ia ki ain ka pyrthei bad ka bor laitluid jong ki ri.
Ka Russia ka la byrngem ba kane ka jingleh ka dei ka jingpynkhein ia ki ain ka UNO ha kaba iadei bad ki ain duriaw bad ka la byrthen ia ka USA ba kam dei ban pynwit ia ka jingiaid lynti ki jhad kit umphniang.
Ki ri ka pyrthei kila kilanmet hadien ba ka USA ka la leit sei na jingthiah ia u President ka Venezuela u Nicolas Maduro bad ka lok jongu, kaba la pyllong ia kiba bun ki ri ban kren pyrshah ia kane ka rukom u Trump watla ki don kiba kyrshan ruh.
Lah ban khie thma| kwah kurup u Trump ia ka Greenland, sa shi jam ngin khyrwit, byrthen ka Russia
