Shillong: Khlem pep, lah ban ong ba ka skhim bylla shi spah sngi ne ka National Rural Employment Guarantee Act (NREGA) kaba la wanrah ha u snem 2009, ka long ka kmie jong ki skhim ban pynroi sha ki jaka nongkyndong.
Kane ka skhim ka la pynkylla dur ia ki shnong ki thaw ha nongkyndong khamtam ki lynti ki syngkieng, ka jingkhuid bad kiwei ki jingdonkam paidbah.
Hadien 16 snem kynthih, mynta ka sorkar pdeng ka la pynkylla kyrteng noh ia kane ka skhim sha ka Viksit Bharat—Guarantee for Rozgar and Ajeevika Mission Gramin (VB—G RAM G) Act 2025 (VB- GRAMG). Ym tang katta, ka la pynkiew ruh ia ka sngi bylla na ka 100 sngi sha ka 125 sngi ha ka shi snem ia kawei ka longïing ha nongkyndong.
U General Secretary ka BJP Meghalaya bah Wankitbok Pohshna ula ong ba ha kane ka skhim, ka sorkar BJP kala pynbha bad pyniar ia ka lyngkha treikam jongka.
Ula ong ba mynshwa ki briew ha nongkyndong, ki shu shna lynti, shna kynroh hynrei mynta ki lah ban pynbha ia ki ïing dorbar, ki skul ruh nalor kiwei kiwei ki kam kiba iadei na ka bynta ka bha ka miat jong ki paidbah.
Ula ong ruh ba la pyntreikam ruh da ka digital ha kaba ym lah ban leh tuh.
Ha kane ka skhim, ka jingbei pisa kan long 90 percent na ka sorkar pdeng bad 10 percent na ka sorkar jylla.
Ka jingthmu ka sorkar ka long ban kyntiew ia ka roi ka par ha ki nongkyndong, khnang ban kynjoh sha ka thong ban pyllong ia ka ri kaba la roi la kiew ha u snem 2047 kum kata ka Vikshit Bharat.
Ka kmie ki skhim nongkyndong | pynbamtis thymmai ka BJP da ka VB-GRAM-G
