Shillong: U snem 2025 un sa leit noh soit ban wan sa u snem 2026. Ka sain pyrthei ha Meghalaya ka la sakhi ia ka jingkhie rasong ka seng thymmai, ka Voice of the People Party (VPP) ha u snem 2025 hadien ba ka la sar naphang ia ka elekshon District Council.
Ka VPP ka la jop 17 ngut ki MDC sha ka KHADC bad 8 ngut sha JHADC kiba don mar 29 ngut ki MDC. Ha KHADC ka la synshar marwei katba ha JHADC ka shong ha ka liangpyrshah.
Ka VPP ka la sospon ruh ia u MLA jongka, u bah Adelbert Nongrum lem bad saw ngut kiwei halor ki kam pyrshah ia ka party.
Ha ka sien ba nyngkong u MDC ka Lyngkyrdem-Laitkroh u bah Shemborlang Rynjah ula shimti kum u CEM ka KHADC hynrei ula risain noh hadien 6 bnai namar ka jingbym khlain bha ka met bad la shimti pateng pat sa u MDC ka Nongthymmai bah Winstone Tony Lyngdoh kum u CEM ka KHADC.
Haba phai sha ki mat ki jura kiba ka jaitbynriew kiba ju pynsawa jam na ka por sha ka por, kine ki dang sah pongding haduh mynta ha kaba ka sorkar Meghalaya Democratic Alliance (MDA)-2 ka la kynjoh sha ka lai snem ban synshar ia ka jylla ha ka jingialam ka NPP.
Haba phaidien ha kane ka shi snem jong u 2025, ki mat ki jura kiba ka jaitbynriew ka angnud kim pat urlong satia. Ki mat ba kham kongsan ki kynthup ia ka jingpynbeit pud hapdeng ka Meghalaya bad ka Assam, kaba dang sah sa 6 tylli ki jaka.
Ka jingdawa ban pyntreikam ia ka Bengal Eastern Frontier Regulations 1873 lane ka Inner Line Permit (ILP) ha kaba ka ïing dorbar thawain ka la mynjur tylli mlon ha u 2019 ban dawa na ka sorkar India. Kane ka mat ka dang sah pongding haduh mynta. Ka jingdawa ban pynrung ia ka ktien Khasi bad Garo ha ka khyrnit ba phra ka riti synshar ka ri ruh ka dang sah ha suin.
Ka jingthmu ban pynkynriah ia ki harijan na them Iewmawlong naduh 2018 ruh, ka dang sah pongding haduh mynta watla ka la iaid sha ka 7 snem kynthih.
La sakhi ruh ha une u snem ia ka jingkylla bujli ka sorkar MDA-2 ha kaba la bujli 8 ngut ki myntri sorkar na ki party kiba don ha kane ka sorkar naduh ka NPP, UDP, HSPDP, BJP.
Ka snem ka sakhi ruh ia ka jingleit iasoh NPP u MLA ka Congress na Mylliem bah Ronnie V Lyngdoh, nangta u MLA barim ka Nongkrem bah Lambor Malngiang. Katba ka UDP pat ka duh ia u nongialam ba hakhmat uba dei u MLA barim, u Dr. Jemino Mawthoh uba la mih noh na ka party hadien phew snem.
Ka Congress ruh ka la pdiang biang ia u MLA barim u Zenith M Sangma sha ka party nalor kiwei.
Napdeng baroh ki mat kiba kham khring ia u paidbah ha u snem 2025, ka jingkhie rasong ka seng VPP ka dei kawei ka mat ha kaba la sakhi ba ki paidbah ki iakren satlak ka ri Khasi-Jaintia.
U snem 2025 ka jingkhie rasong ka VPP ha Khasi-Jaintia|shi khung ki mat ki jura bym pat pynurlong ka MDA-2
