Shillong: 8 tylli ki seng ki samla pule na North East hapoh ka lama ka NESO kila pynher shithi sha u myntri rangbah ka jylla Utterrakhand, u Pushkar Singh Dhami ban dawa pynshitom kaba kut ia kiba donkti ban pyniap dusmon ia u samla pule na jylla Tripura dang shen ha Dehradun.
Ki 8 tylli ki seng samla pule ki kynthup ia ka Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) bad ka All Arunachal Pradesh Students’ Union (AAPSU) kila dawa ba dei ban ai ka jingpynsaja kaba kut ia kiba donkti ban pyniap ia u samla na Tripura u Anjel Chakma uba dang pule MBA ha Dehradun, Utterakhand.
Ka NESO ka la dawa ruh ban buh ia ka tnad pulit kaba kyrpang ban peit ia ki briew kiba dei na North East khamtam kiba iadei bad kane ka jingjia bad ka jingshah pyndik bad shah thombor ki briew na North East bad ban thaw ia ki ain kiba khlain pyrshah ia ka jingisih jaitbynriew.
U chairman ka NESO bah Samuel B Jyrwa bad u GS u Mutsikhoyo Yhobu kila pynrem jur ia ka jingshah pyniap u samla na Tripura bad kila dawa ka jingbishar hok ia u samla Anjel ka dei ban ieng.
Lah ban kdew ba u Anjel ula khlad noh ha jaka sumar hadien ka jingshitom jur ha ka 26 tarik Nohprah hadien ba ula shah hiar thma ha ki briew ha Dehradun ha ka 9 tarik Nohprah, kiba kynnoh bad kren bein ia u kum u China.
Pynsaja da kaba kut ia kiba donkti ban pyniap ia u samla na Tripura: NESO
