Shillong: Ka seng Confederation of Meghalaya Social Organisations (CoMSO) ka la pynrem jur ia ka jingshah pyniap u samla pule u Anjel Chakma, uba dang 24 snem ba pule MBA na Tripura ha Dehradun, Uttarakhand ha ka 26 tarik Nohprah, 2025.
Ha ka kyrwoh khubor, u chairman ka CoMSO bah Roykupar Synrem u la ong ba ka jingshah pyniap u samla Anjel ka dei ka kam runar kaba shyrkhei, kaba ki samla na ki jylla North East ki ju iakynduh man ka por ha kiwei kiwei ki jaka ka ri India, da kaba shah kren bein kum ki briew na China bad shah hiar thma bunsien.
Ka CoMSO, ka la dawa ba ka sorkar Uttarakhand bad ka Ministry of Home Affairs ka sorkar India ban buh ia ia ka fast-track court trial ban tian bishar ia kiba donkti ban pynioh ia ka jingbishar hok kaba sted.
Ka la dawa na ka sorkar pdeng ban bthah ia barh ki sorkar jylla ban buh ia ka “North East Helplines” kaban treikam baroh 24 kynta bad ka tnad police kyrpang ha man ki nongbah ban pynthikna ia ka jingshngain ki briew na North East.
Ka la ong ruh ba ki jaka pule, ki jaka trei bad ki bor synshar ki dei ban kitkhlieh ia ka jingbym lah ban ai ka jingshngain ia ki samla pule kiba na North East.
Ha kajuh ka por, ka CoMSO ka la long kaba kloi ban iasoh bad ki kynhun kiba don ha North East ban pyllong ia ka jingiakhih katkum ka riti synshar paidbah ban pyrshah jur ia ka jingisih jaitbynriew pyrshah ia ki briew na North East da ki briew kiba sah sha ki jaka rithor.
Lah ban kdew ba u Anjel ula khlad noh ha jaka sumar hadien ka jingshitom jur ha ka 26 tarik Nohprah hadien ba ula shah hiar thma ha ki briew ha Dehradun ha ka 9 tarik Nohprah, kiba kynnoh bad kren bein ia u kum u China.
Ki kren bein kum u China|kloi ka Comso ban mih bad ki kynhun NE halor ka jingshah pyniap u samla na Tripura
