Shillong: Mynta ka sngi ka 24 tarik u Nohprah 2025, Ka KSU Raid Nongtung Circle hadien ka jingud ki paidbah nongshong ka shnong Umsaw Lum Dorbar kaba don sha ki thaiñ khappud bad ka Assam ka la pyntih bad pynbha ia ka surok ha katei ka shnong da kaba phah da ka puhshilum ne JCB bad kane ka long kum ka jingai sngewbha ban lehkmen khristmas.
Ha ka jingpyllait khubor, ka KSU ka la ong ba kumban shu pynkynmaw kumba 30 tylli ki longiing kila shah thang ha ka tnat Forest Assam ha u Snem 2005, ha kaba ki Nongialam hapoh ka jingialam u Bah Samuel B. Jyrwa u President KSU Sengkmie ha kato ka por, Bah Hamlet Dohling u General Sect barim ryngkat u Maieid Hopingstone Lyngdoh ki la leit mardor ban leit khmih, ban leit ai jingiarap bad iada ia ki paradoh parasnam ha katei ka shnong bad ki la pynshim wai da kawei ka jaka ban sher dara shipor na ka bynta kitei ki longiing.
Katei ka jingleit pyntih ka KSU Raid Nongtung Circle ia ka surok ka dei ruh hadien ba ki nongshong shnong ki la ud bad pynsngew sha u Bah Samuel B.Jyrwa (Chairman NESO) ha ka 16 tarik ha ka jingleit jngoh jong I ia ka tei ka shnong.
Ki nongialam ka KSU bah Edmund Shadap uba dei u President KSU Raid Nongtung Circle bad Secretary shnong Umsawlum Dorbar bah Bah Khrawbor Lyngdoh kila pynpaw ia ka jingkmen ban ioh ia kane ka surok kaban pynsuk ia ka leit ka wan ki paidbah nongshong shnong.
Da surok pynshna ka ksu kum ka jingai sngewbha Khristmas
