Shillong: Kum shi bynta ban rakhe ia ka lyngkhuh snem kaba 50, ka Meghalaya Football Association (MFA) hynnin ka miet jong ka lah sngi U Blei, ka la pynlong da ka jingialang ban pynkup burom ia ki rang bad ki thei ialehkai phutbol ka jylla, kiba la bteng ia ka jingim ka jong ki ban ioh ban da mihkhmat ia ka jylla, ha kaba ka jingpynkup burom ka la bteng ruh wat sha ki coach, referee ne wat ki para dkhot kiba la ioh ban iadon bynta lem naka bynta ki kam phutbol jong ka ri.
Ia kane ka jingialang la pynlong ha State Convention Cente, ha kaba u kongsan ba la wan ban don lang dei u Myntri ba dei khmih ia ka tnat Sports & Youth Affairs u bah Wailadmiki Shylla, nangta bah Banteidor Lyngdoh (MLA Mawkynrew) President ka Shillong Sports Associatuon, bah Gavin M Mylliem MLA , u Advicer ka sorkar jylla u bah Himalaya M Shangpliang, u Chief Secretary barim ka sorkar jylla bah D.P Wahlang, u Kipa Ajay Treasure ka All India Football Association, President bad Secretary ka MFA Bah Hamletson Dohling bad bah Sunesh M Syiem, ki dkhot nongkit kam ka MFA bad kumjuh jong ka SSA bad ki synjuk ialehkai phutbol jong ki district.
Ia ka MFA la seng ia ka ha u snem 1976, kaba da kane ka jingialang nangne shakhmat kan khreh ba kan pynlong ia kiba bun pat ki prokram ki jong ka ha ki sngi bad ki bnai ban sa wan,
Ka thup kyrteng ki nongpdiang ia ki khusnam, ka long da shisha kaba pynsngew sarong ia ka jylla, kiba dei ka jingtreishitom, ka jingkut jingmut, len lade bad aiti lut ka jong ki player, ba ka pynlong ia ka Meghalaya ba kan lah ba kan sei ia la ki jong ki rang bad ki thei ialehkai kiba da kynsai bd ba nylla.
Ka khusnam ba la sdang ban sam nyngkong eh jong ka janmiet, ka leit sha (L) bah Fullmoon Pyrtuh, u player ban ioh mihkhmat ia ka India ha ka lympung ialehkai jong ka 13th Asian School Football Tournament bad kumjuh sha (L) John Shadap ba la don bynta bad ka kynhun U-17 ka India ha u snem 2004.
Kiwei pat kyrteng kiba la mihpaw ha kane ka janmiet pynkup burom ki long Rocus Lamare, Eugeneson Lyngdoh, Aiborlang Khongjee, Marlangki Suting bad Samuel Lyngdoh Kynshi ia kaba la bynrap lang da ka jingpynkup burom, ia ki thei ialehkai kum ka Bonifilia Shullai, Alisha Lyngdoh, Fragrancy Riwan, Ribansi Jamu bad Ribahunshisha Kharshiing.
Lait na kine, ka jingialang ka la wan shakhmat ba kan ainam bad pyrto lem ia coach kiba la paw kum bah Hering Shangpliang ba la coach ia ka kynhun jong ka Indian U-20 ha u snem 2000-06, ka kong Riiohlang Dhar kaba la lah ba kan kynjoh shaduh ka kyrdan kum ka Fifa Assistant Referee bad ban shah jied ban pyniaid ia ka U-17 Women’s World Cup 2024, la pynkup burom ruh ia u Secretary barim bah Bor Diengdoh bad u bah Hamletson Dohling kiba la shah jied ban long kum u Manager ka kynhun ialehkai football jong ka India.
Kiwei kiwei pat ki player ba ka MFA ka la pynkup burom hynnin ka miet ki kynthup Pele Lyngdoh, Wiwon Kurbah, Weilad Passah, Lekini Suting, Ailad Kharngapkynta, Poibiang Pohshna, Bevan Marbaniang, Larry Diengdoh, Samuel Shadap, Berland Syngkon, Romeo Suklein, Chanmitre Thma, Kyntiew Shaphrang Kharluki, Enestar Malngiang, Shaiborlang Kharpan, Rupert Nongrum, Pynkhrawbok Kurbah, Aenam Graffenberg Jyrwa, Banlam Nongkynrih, Aiborlang Thangmaw, Ricky John Shabong, Lionel Daryl Rymmei, Halen Nongtdu, Manbhakupar Malngiang, Banlamkupar Rynjah and Ronney Wilson Kharbudon.
Ha ka jingkren maitphang , u bah Hamletson kum u President ka MFA, u la ieng ban pynkynmaw ia ka sien jam ba ka synjuk ka la dep ba kan shim ia ka rai bad katta ka long ba nangne shakhmat, ka synjuk kan da ai ia ka song iarap sha ki rang ne ki thei ialehkai lada jia ba ki ioh ia ka kabu ksiar ban shah jied ban mihkhmat ne phong ia ka jersey jong ka India.
Katba na ka liang u bah Wailadmiki Shylla, uba ialade ruh u dei uba ieit bad sngewtynnad bha ia ka phutbol, u la pynpaw ia ka jingthmu ka sorkar ban tei ia ka Mawkhanu Football Stadium, ha ka juh ka por ba kum ka jylla, ka la lah ha kaban ioh ba kan pynlong lem ia ki lympung bah ialehkai phutbol ka ri kum ka Durand Cup, ka jingialehkai jong ka Indian Super League, bad ki lympung ialehkai phutbol ba dei jong ka ri, kampher lada dei jong ki kynthei ne shynrang (international matches).
Ia ka jingai khublei, la ioh na u secretary ka MFA bah Sunesh.M. Syiem.
Plie pyrda ka MFA ia ka jubili ksiar, pynkup burom ia ki nongialehkai ba paw ka jylla
