Shillong: Ki pulit ka East Jaintia Hills kila ioh kem 2 ngut ki briew halor ka jingbthei bom IED ha Dhar Company ha shnong Shymphlong, East Jaintia Hills ha ka shiteng miet ka 15 tarik Nohprah 2025.
Kiba shah kem halor ka jingkynnoh donkti ha kane ka kam, ki dei ba la tip kyrteng u Richard Suchen 31 snem na Shymplong bad u Pynshaitbor Syih 45 snem na kajuh ka shnong Shymplong East jaintia hills, Meghalaya.
Ha ka kyrwoh u Superintendent of Police (SP) ka East Jaintia Hills, u Vikash Kumar, IPS ula ong ba ha ka jingtohkit, la lap ia ki sakhi ba u Smiki Tongper uba dei na kane ka shnong Shymplong, ula plan bad ialam ban leh ia kane ka kam ryngkat ka jingiasylla bad kitei ar ngut kiba la shah kem bad uwei u dkhot ka seng HNLC.
Ki pulit kila kam ruh b aune u Smiki u dei uba don mukotduma POCSO ruh halor ka jingthombor ia ka khynnah ha Khliehriat Police Station.
Ha ka jingleit talasi ki pulit na ïing u Smiki, kila ioh kurup 3 song ki fuse, 2 tylli kiba rit, 3 tylli ki tikli, 6 tylli ki tikli ba la thylli, ki bakhor, 82 tylli ki tiar nep, kawei ka suloi shna hi, 2 tylli ka handset bad 5 tylli ki fuse.
Na ka liang u SP ula kyrpad ia ki briew kiba ioh jingtip ia ki runar kiba donkti ha katei ka kam beain, ba kin pyntip sha ki pulit bad kin ym pyllait eiei ia ka kyrteng jongki.
Shah kem 2, dang thwet ia kiwei ba pynbthei bom IED ha Shymphlong
