Shillong: Ka shnong Nongkhyriem, Nongthymmai ka la rakhe mynta ka sngi ia ka jingdap pura sha ka 75 snem kynthih ha ka jingithuh ia ka shnong jongka.
Haba kren ha ka jingrakhe u MLA uba dei ruh u Adviser ka tnad Social Welfare bah Paul Lyngdoh kum u kongsan, ula ban jur ba kum ka jaitbynriew kaba rit paid, ka lynti kaba donkam ban pynkhlain ka dei lyngba ka jingtbit namar ban iakhun da ka jingbun paid, ym lah leh eiei bad kiwei kiba la bun paid da ki spah shah.
U la ong ba ki don ki Khasi kiba ong ba ki don khun 12 ngut, don kiba ong 14 ngut hynrei don katba don, ka jingdon briew ka jaitbynriew kam pat tam ia ka 20 lak katba kiwei ki jaitbynriew kiba shu leit ontep ia u Subin Garge ha Guwahati, ki iamih 25 lak ngut. Ban iakhun kum ka jaitbynriew ka donkam ia ka jingtbit ne quality ym da ka jingbun ne quantity, namar ba lada leit sei lut kiba na phatok, na hospital ruh, ym pat dap hi, hynrei ka quality ka donkam ban iakhun bad kiwei pat.
Ha kajuh ka por, u la ong ba ka Sixth Schedule ka riti synshar ka ri, ka dei ka atiar kaba la pynkup bor ia ki dorbar shnong, ki hima lyngba ki District Council, hynrei dang don kiba kwah ban pynduh noh ia ka District ba kham lah ka artikil 371.
Ula ai nuksa ba u Sonam Wangchuk u la iakhih ban dawa ia ka Sixth Schedule na ka bynta ka Ladakh katba ma ngi, kiba la ioh, la kwah pynban ban pyndam.
Kiwei pat kiba kren ki long u bah Pyniaid Sing Syiem u CEM barim ka KHADC, u Dr. Jemino Mawthoh u MLA barim, bah Banri Nari u President ka Synjuk Rangbah Shnong Nongthymmai Pyllun bad kiwei.
Ka shnong ka la sam khusnam ruh ia ki samla, ki riew rangbah kiba la wanrah nam ia ka shnong ha ki jingpule, bad ha kiwei kiwei ki jait kam.
18 lak ki Khasi, lada sei lut na phatok, hospital ruh, ym pat long, 25 lak tang kiba leit ontep ia u Zubeen Garg: Paul
