Shillong: Ka Congress Meghalaya ka la ther ia ka sorkar BJP kaba la pynkylla kyrteng ia ka skhim Mahama Gandhi National Rural Employment Guarantee Act (MGNRGA) ne kaba ju tip paidbah kum ka skhim 100 sngi.
Ka BJP ka la pynkylla kyrteng ia kane ka skhim sha ka Viksit Bharat Guarantee for Rozgar and Ajeevika Mission (Gramin).
Ka Congress ka pyrshah jur ia kane ka jingleh bad ka la kynnoh ba ka rukom leh ka BJP, I kumba ka kwah ban pynduh ia kane ka skhim da kaba pynjynjar ia ki paidbah ban trei ia kane ka kam bad ka pynjynjar ia ki nongsuplai mar ban ia thait bad kin sa leit pyndem noh.
Haba kren sha ki lad pathai khubor mynta ka sngi, u nongialam ka Congress u bah Manuel Badwar bad u Samla Banphira Basaiawmoit ki la ong ba kane ka jingpynkylla ia ka kyrteng jong kane ka ain kaba la don lypa, ka long kum ka jingthombor ia ki briew kiba donkam jingiarap na ka sorkar.
Ki la ong ba ha ka por ba wanrah ka Congress ia kane ka ain, 100 percent ka jingbei tyngka ka wan beit na ka sorkar pdeng, hynrei kane ka Bill thymmai, ka bhah na ka sorkar pdeng kan long 90 percent katba 10 percent na ka sorkar jylla.
Lada ka jingbei tyngka ka kylla noh, ka jingeh ka long ia ka sorkar jylla ka lah ne em ban pynbiang ia ki jingdonkam jong ki nongbylla job card kiba don kumba 15 lak tam ngut eiei.
Ka jingthmu jong kane ka ain ka long khnang ba ki paidbah ha nongkynong kin ioh ia ka kam ka jam.
Ka Congress kan pyrshah jur ia kane ka ain ka BJP bad ka la iawer ia baroh ki seng sain pyrthei kynthup ka VPP, NPP, UDP, HSPDP ban pyrshah ia kane ka ain ba la wanrah da ka sorkar BJP.
Halor ka jingpynjlan ia ka 100 sngi sha ka 125 sngi, ka shong ha ka jingpynmih ka sorkar pdeng ia ka jingpynbna bad ka shong katkum ka jingpyllait pisa kaba la shna da ka sorkar pdeng.
Ia ka MREGA la pynlong ain ban pynkhamti ia ki paidbah ba kin ioh ia ka hok ban ioh ia ka hok khnang ba ki paidbah kin lah ban dawa ia ki jingdonkam ha shnong hynrei mynta ka la kylla khongpong,
Ka jylla ka dei kaba duna pisa, bad kumba 100 percent ka jingbei tyngka ngi donkam beit na ka sorkar kmie.
Ther ka Congress ba jer kyrteng thymmai ka BJP ia ka skhim 100 sngi|Wer ia kiwei ki parti ban pyrshah lang
