Shillong: U myntri ka tnad jngohkai ka jylla u Timothy D Shira ula ong ba ka jingkynnoh, ka jingdohdaw wohnia ka don beit lada leh kaba bha ne kaba sniew ruh namar ba ka dei ka kamram ka liangpyrshah.
Kane ka dei ka rukom ba ki liangpyrshah ki leh, khnang ban ioh kabu sain pyrthei ban pynsangah ia ka sorkar.
Ia kane ula ong haba kylli shaphang ka jingeh jong ki nongtrei ka GHADC, ha kaba u myntri ula ong ba ka sorkar ka laleh ia kaba bha tam ban siew ia ka tulop jong ki nongtrei kaba la sah bun snem.
Ula ong ba ha Kane ka elekshon MDC ruh ka liang pyrshah kan kynthah bad wad daw laiphew jait ban ther ia ka sorkar watla ka la leh ia kaba bha bad ula sngew skhem ba ka NPP kan sar ha ka MDC elekshon.
Halor ka jingioh lad ki bar jylla ban iashim bynta ha ka MDC elekshon, u Timothy ula ong ba la shah ia ki bym dei riewlum ban iashim bynta ha MDC elekshon ha GHADC namar ba ka mynsiem ialong shi paralok ha kaba baroh ki iadon bynta ban ialeh ia ka jinglaitluid bad dei na kane ka daw ba ki ailad ia ki bym dei riewlum ban iashim bynta ha ka GHADC elekshon hynrei ha kane ka por mynta ka la pher namar ba ki briew mynta kim tip ia ka histori.
‘Ki liangpyrshah kin wohdaw beit lada leh bha ruh | Ki bym dei riewlum ki lah ban shim bynta ha GHADC’, ong u Timothy
