Shillong: Ka seng Hynniewtrep Achil National Movement (HANM) East Khasi Hills ryngkat seng kmie, kila byrngem ban leit kyrniom ia ki dukan ki bar jylla lada ki dang bteng ban leh thok ia ki paidbah kiba thied kiba siew.
Mynta ka sngi, ka HANM ka la leit talasi kot ha Iewduh bad ka la ioh khang ia ki katto katne ki dukan bar jylla, kiba ka la kam, kim biang ki kot ki sla hynrei shwa ba kan iaid shuh shuh, la wan pynsangeh noh ki pulit ia kane ka jingleh ka HANM.
Ka la don ka jingiapyni nia bad ki nongialam ka HANM bad ki pulit katto katne por ha kaba ki pulit kila ai jingmut ba lada ki talasi ki dei ban wan bad ki bor ba dei peit, ym ban wan leh hi kumne.
Hadien ka jingiakren, ki nongialam ka HANM kila rai ban sangeh noh shwa ia ka jingkhynra bad kin sa bteng biang shen.
Ngin leit kyrniom lut ia ki dukan bar jylla kiba leh thok ia ki paidbah, byrngem ka HANM
