Shillong: Ka Employment Monitoring Cell jong ka Khasi Students’ Union mynne mynsngi ka la ïoh ban kynduh ïa u Chairman bad ki members jong ka Meghalaya Public Service Commission (MPSC) ban bud dien halor ki mat ban pynbha ïa ka MPSC. Ka Sorkar Jylla hadien ka jingiakhih jong ka Seng ka la thaw ïa ka Committee ban wanrah ïa ka jingkylla ha ka MPSC bad kane ka Committee ka la ai ïa ka rai jong ka ha 26 tarik u Jylliew, 2025 bad ki mat ba ha khmat ki long: ban pynlait paidbah ïa ki marks jong ki nongthoh eksamin, ban pynlait ïa ki answer key, ban pynlait ïa ka jingdon jingem jong ki nongtrei ka MPSC, ban pynlait ïa ka report treikam jong ka MPSC man u snem bad kiwei kiwei ki mat.
Hynrei ka Seng ka dap da ka jingbitar ba ka MPSC haduh mynta kam pat pyntreikam pura ïa kine ki rai jong ka Committee bad ka ai daw ba ka MPSC ka synshar hi dalade bad kim pat ïoh ban bishar ïa ka report jong kane ka Committee. Ha ka jingïatainia bad ki nongïalam ka Seng, na ka liang u Chairman khatduh khatwai u la pan por ban bishar bad pyntreikam ïa kane ha u snem thymmai namar sa katto katne sngi ki ophis sorkar kin khang noh na bynta Khristmas.
Ka MPSC ha kine ki sngi la lah ban ïohi ba ki dap da ki jinghuri hura suda ha kaba la ioh jingujor ba ki jaka leh eksamin (Examination Centre) ki khynnah thoh eksam ki ïoh rah ïa ki mobile, ki invigilators ruh kim biang bad um ju don nongwan nongkhmih na MPSC, bad ka por thoh eksam ruh kam beit ha kaba don ki jaka ba ki khynnah ki duh ei ïa ka por thoh eksam ka jong ki namar ki bor pynïaid ki slem. Ki don ruh ki eksamin ha kaba ki samla ba pass ki dei beit baroh na kawei ka kamra kaba pynsuba ba ka don ka jingleh thok.
Ki bor pynïaid jong ka MPSC ruh i kumba leh katba lah ban thep briew sop sop ne thep tuh ïa ki briew ha ki kam sorkar bapher bapher. Iwei i nuksa ka long halor ka kam typist ba dang shu dep mynshem taiew ha kaba ka written examination ka dei ban long da ki MCQ kumba ka ju long barabor, hynrei mynta u snem pat ka long da descriptive 50 marks. Ka daw ba ki kwah ban pynlong eksamin da descriptive ka long ba lyngba MCQ yn ym lah ban leh thok ha ki marks hynrei lyngba descriptive kin lah ban ai marks katba mon ba pyn pass ïa ki briew jong ki. Na ka liang ka Seng ka pyrshah jur ïa kane ka eksamin bym hok bad ka dawa ban weng mardor namar ba katkum ka DoPT guidelines ruh kam shah ïa kane.
Shuh shuh ban pynpaw ïa ka jingjyrsieh ha MPSC, kaba sngew lynngoh ka long ba u Secretary ka MPSC u Ashish M Sangma uba la shah suba ba don kti ha bun tylli ki kam bamsap ha MPSC u la shah weng noh kum u Secretary MPSC bad la pynkynriah noh sha kiwei ki tnad Sorkar la palat 4 bnai hynrei haduh mynta pat u dang shong sah bad bat kam kum u Secretary ka MPSC kaba pyni ba ka MPSC ka synshar donbor ban pynksan ïa ka kam sniew ka jong ki.
Ka Seng ka ai por 24 kynta ïa une u briew ba un ïeh noh ïa kane ka kam Secretary lem kumta ka Seng kan shim ïa ka sienjam ba eh. Bad shuh shuh lada ka MPSC kam pyntreikam pura ïa ki jingkylla ba la phah da ka Committee bad pynlait paidbah ïa ki marks jong ki eksamin baroh naduh ba la pynlait paidbah ïa ka rai jong kane ka Committee, ka Seng ha u snem thymmai pynlong da ka jingïakhih kaba jur bad pyntikna ba ka thungkam thungjam ha ka jylla kan long kaba khuid. Kane ka long ka kyrwoh na u samla
Reuben Najiar, Asst General Secretary cum Chairman Employment Monitoring Cell ka Khasi Students’ Union.
Hapoh 24 kynta ieh noh ia ka kam Secretary ka MPSC | bun ki jyrsieh thungkam ha MPSC:KSU
