Shillong: U MP ka Lok Sabha na Shillong u Dr. Ricky Andrew J Syngkon ula iakynduh markhmat ia u myntri ka tnad kam pohïing ka ri India, u Amit Shah ban dawa ban pynsted noh ban ai ia ka Inner Line Permit (ILP) hapoh ka Bengal Eastern Frontier Regulation, 1873 ia ka Meghalaya.
Ha ka jingiakynduh ia u Amit Shah ha New Delhi, u Dr. Ricky ula batai bniah ia ka jingdonkam ka ILP ia ka Meghalaya ban iada ia ki trai muluk riewlum, kumba ka sorkar India ka la ai ia ka Manipur, ka Arunachal Pradesh, ka Nagaland bad Mizoram.
U Dr. Ricky ula ong ba ka ïing dorbar thawain ka Meghalaya ha ka 19 tarik Nohprah, 2019, ka la shim bad mynjur ia ka rai mlon baroh naduh ka liangsynshar bad ka liangpyrshah ban dawa na ka sorkar India ia ka ILP, kaba dei ka jingdawa kaba slem ki paidbah ka jylla.
U la ong ba ka riti synshar lyngba ka Sixth Schedule, ka la ithuh ia ki jaka ki riewlum ha ka North East bad ka ai ia ka autonomous district council ha Assam, Meghalaya, Tripura bad Mizoram ban iada ia ki khyndew ka shyiap, ka lariti bad ki riri dustur.
Ka ILP kumba la pyntreikam ha Arunachal Pradesh, Nagaland, Mizoram bad ha Manipur, ka la don kajuh ka jingthmu ban iada ia ka jingwan rung kyrthep ki bym dei riewlum ha ki jaka riewlum.
Ka Meghalaya ruh ka don ia kane kajuh. Ka dei ka jylla kaba mih na ka jylla Assam ha kaba ka don ka jingma na ka jingshah tyllep ha ki briew bym dei riewlum. Ka jingpyniar ia ka thapniang ka ILP sha Meghalaya kan pyllong ia ka jylla kaba iahap kyrdan bad kiwei ki jylla ha kane ka North East bad kan pyndep ia ka nongrim ba ka riti synshar ka ri bad ka Parliament ka la pynkup bor.
Watla ka Sixth Schedule ka la pyrkhing ia ka jingthied bad die jaka ha ki jaka kiba hap ha ki Autonomous District Council hynrei shabar kum ha European Ward, Cantonment kim hap ha ka jingiada ka Sixth Schedule ha kaba ki bar jylla ki ioh ban thied jaka.
Ka ILP kan ym beh ia ki nongshong shnong ka India hynrei ka donkam ia ki ban pynshisha haba ki wan rung sha ka jylla bad kane kan iarap ruh na ki kam bymman, ia ki riew shim kabu ban thied jaka da ka Benami.
Kan pynkhlain ruh ban peitngor ia u pud u sam bad kan wanrah ka jingshngain ha ka ri khamtam ba ka jylla Meghalaya ka dei kaba don khappud bad ka ri Bangladesh bad kumjuh ka jylla Assam.
Ka jingwanrah ka sorkar ban teh skhem ia ki saikhum ka Immigration and Foreigners Bill, 2025 ban tehlakam ia ki briew ba rung beain ha ka ri, kan iarap kham bha lyngba ka ILP bad kan khang lad ia ki riew shim kabu ban pyndonkam ia ka Meghalaya kum ka lynti ban wan jngohkai da kaba leh pat ki kam bymman.
Ka jingpyntreikam ia ka ILP, kan pyni sha ka pyrthei ba ka sorkar India ka burom bad ka sumar ia ki rilum ka North East na ka bynta ka jingiadei bad ka ri India.
U Dr. Ricky ula ong ba ka ILP kam dei ban pynthut ia ka kam jngohkai bad ki kam pynroi bad ia kane, la sakhi kumba la jia ha ki jylla kiba la don ka ILP kum ka Arunachal Pradesh, Nagaland bad ka Mizoram ha kaba ki nongwankai ki tuid khlem kano kano ka jingshah khang lad.
Shuh shuh ula mong ba ka sorkar Meghalaya ka la wanrah ia ka Meghalaya Residents Safety and Security Act (MRSSA) bad ka la kloi ruh ban pynbeit ia ki jingpan jingshai ka tnad kam pohïing ka ri kaba pyni ruh ia ka jingkwah ban pyntreikam noh ia ka ILP. Ka ILP kaba la pynwan dur bha ryngkat ka MRSSA kan kyntiew ia ka jingkitkhlieh ia ki briew kiba nabar ban rijister, kan wanrah ka jingshngain ia ki, bad kan pynsuk ban buddien haba don kano kano ka jingjia bad kane kan tei ia ka jingsngew skhem ia ki trai jylla ba ka kam jngohkai bad ka jingwan bei tyngka kan iaid ryngkat ka jingkitkhlieh da kaba burom ia ki hok bad ki riti dustur jong ki trai jylla.
U Dr. Ricky ula ai jingmut ha u Amit Shah ban thaw ia ka Joint Technical Committee kynthup ki ophisar na ka sorkar India, bad ka sorkar Meghalaya ban shim rai ban pyntreikam ia ka ILP ha Meghalaya ryngkat ka jingiasyrdoh bad ka MRSSA bad ki ain National Immigration Laws.
Ka Meghalaya bym ioh ILP, markhmat kynduh u Dr. Ricky ia u Amit, dawa ban pynsted noh ban ai ILP
