Shillong: Ka LP skul Yiarbiniaw hapoh ka Umniuh-Tmar Elaka, ka la rakhe ia ka jingdap 50 snem kynthih jongka ban ai ka jingshakri ia ki briew katei ka thain ha ka pule puthi.
La seng ia ka skul ha u snem 1975 da ki sirdar barim bah Rijoy Singh Khongshah ryngkat bah Horsing Khongbeh bad kiwei ki riew rangbah.
Ha kane ka sngi Saitjain ba la dep, Managing Committee jong kane ka skul, ka la pyllong ia ka jingrakhe kyrpang ia kane ka skul haka jingdon lang u MLA ka thain u bah Balajied Kupar Synrem, ka MDC kong Grace Mary Kharpuri, ha ka jingsakhi lang ki riew rangbah, ki kmie ki kpa, ki khynnah skul.
U acting Sirdar ka Elaka Umniuh-Tmar bah Premier Singh Khongbeh uba dei ruh u President ka Managing Committee jong kane ka skul, ula pyniaid ia ka jingialang.
Kum ka dak ka jingrakhe dap 50 snem jong ka skul, la ot ruh ia u cake.
La ioh ruh ia ka jingrwai, ka jingshad na ki khynnah skul bad ki nongshong shnong ban pyndon burom ia kane ka sngi.
Rakhe ka Yiarbiniaw LP skul ia ka jingdap 50 snem kynthih
