Shillong: U Myntri Rangbah ka jylla u Conrad K Sangma ha ka 12 tarik Nohprah 2025, ula leit jngoh ia ki samla pule doctor kiba nyngkong eh jong ka Shillong Medical College, ha Pasteur, Lawmali, Shillong.
La don lang ruh u Myntri ka tnad ka koit ka khiah u bah Wailadmiki Shylla, nalor ki doctor, ki samla pule bad ki ophisar ka tnad ka koit ka khiah.
Haba kren ha kane ka jingleit jngoh, u Conrad ula pynmih wat ia ka kyntien ba lada u dei ban pynrah um lem ruh, un leh ia kata na ka bynta ki samla pule doctor. Kane ka jingkren jongu, ka la pynrkhie ia kiba don ha kane ka jingialang ban ai ruh ka jingthap kti thlap lap lap. U la ong ba kum ka College ba dang thymmai, kin don shibun ki jingeh hynrei ka sorkar kan iakhun ban pyllong ia kane ka college kaba kynsai.
Kane ka jingkren jong u, ka long ban pynpaw ba ki samla pule ki lah ban kynduh shibun ki jingeh khamtam haba kane ka Medical college ka dang dei kaba sdang mynta u snem.
Kham hadien ula iasyllok ruh bad ki samla pule ha kane ka college ban tip ia ki jingeh, ki jingsngew tynnad.
‘Lada dei ba ngan pynrah um lem ruh nga kloi’, ong u Conrad ia ki samla pule doctor
