Shillong: Ki paidbhur kiba la tuid kylleng ki jaka ka ri ban leit peit ia u khlur phutbol ka pyrthei na ri Argentina, u Lionel Messi, kila khie bitar puk hadien ba la kynnoh ba ki bor pyniaid, kila shu ialam ban pyni dur khmat tang 10 minit ia u Messi ha Salt Lake Stadium, Kolkata mynta ka sngi.
Kane ka la pynbitar ia ki paidbah kiba kwah ban ioh shon dur, ban iohi kham slem ia u Messi, bad kila pynpra ia ki jaka shong, kila tied naphang ia ki jingshna ha katei ka stadium.
Ki la pynpaw ba kila wan khnang na jngai bah bad siew ruh ia ka ticket kaba 5 haduh 15 hajar tyngka hynrei ki jew slew ia ka jingbym ioh lad ban peit hun ia u Messi.
Ha ka jingiaid pyni dur u Messi ha Salt Lake Stadium, la ioh kerkut tang ki nongshon dur, ki heh sorkar, ki politishian, ki tyngshop ki puron katba ki paidbah kim ioh peit bha.
Na ka jingtur puk u paidbah, ki pulit kila pyrshang ban pynpra da kaba pyndonkam da ki lathi. Ki paidbah da ki phew hajar, kila kynnoh ba ka dei ka jingbym ler ki bor pyniaid.
Ka dei ka jingjia kaba sngewsih ki paidbah kim iohi ia u Messi, namar ba la kerkut lut tang ki heh sorkar, bad kim iohi ba u Messi un kynjat ia ka bol, hynrei la shu pyniaid, la kynnoh ki paidbah.
Halor kane, ki pulit kila kem ia u Event manager kiba khot ia u Messi halor ba kim lah ban pynbit pynbiang kumba ka dei.
Trei ka jadu u Messi, puk tur ki paidbah sha Stadium, pynpra ia ki shuki, kawang bilor, shah kem u Event Manager
