Shillong: U President ka Voice of the People Party (VPP) u bah Ardent Miller Basaiawmoit u la ong ba ka long kaba ithamula haduh katta katta ia ka jinglong jingman ka sain pyrthei ha kane ka jylla.
Ha ka jingkren mynta ka sngi, u bah Ardent ula ong ba ka sorkar kaba dei ban pyllut por ban ai ka jingshakri ia ki nongshong shnong, ka bunkam pynban ban pynkhreh ia ka elekshon 2028.
U la ong ba la iohi ba u myntri rangbah uba dei ban shong ha ophis ban pyndep ia ki kam na ka bynta ka jylla, u leit ialap elekshon pynban kylleng kylleng ki konstitwensi bapher bapher ban pynkiew skong ia la kijong ki kyrtong kaba kila pynkhreh na ka bynta u 2028.
Bunsien haba leit ban kynduh ia u myntri rangbah, um ju don ha ophis. Kane ka pyni ia ka jingdukha mynsiem bad ka jingsheptieng kaba khraw jong ka sorkar ia ka VPP, ha kaba u paidbah ula pyni lypa ia ka jingkhang na ka bynta jongki, ba ki hap ban mih noh na jaka kaba ki don mynta.
U bah Ardent ula ong ruh ba haba ki leit sha ki jingialang, ki pynshit bad kynshoit ia u paidbah pyrshah ia ka VPP, ha kaba kila pynshoi ia u paidbah ba ka VPP ka dei ka seng sain pyrthei ki Khristan. Ha ka jingshisha, ka VPP ka la pynshai bunsien halor kane ka bynta bad ka jingkylli ka long hato maki, ki donkam pat ne em ka jingkyrshan ki paid Khristan. U la ong ba ka VPP ka leit sha u paidbah ban pynsngewthuh ban pynduh ia ka jingsngew niam, ka jingsngew balang, ka jingsngew dong, ka jingsngew thain hynrei ban wanrah ia ka jingiatylli ha ka jaitbynriew hynrei maki, ki leit ban kynshoit ban pynthame ia u paidbah.
U bah Ardent ula ong ba ka VPP ka kyntu ia ki paidbah ba kim dei ban pdiang ia ki buit ban pynpait ia ka jaitbynriew na ka bynta ka jingmyntoi Jongno Jongno.
Ithamula khait, u Myntri Rangbah u leit ialap elekshon pynban sa 2 snem ruh| kynshoit niam ia ka VPP: Ardent
