Shillong: U President ka UDP u bah Metbah Lyngdoh ula kyntait ban kren eiei halor ka jingkren u Working President u bah Paul Lyngdoh dang shen, halor ka jingbujli myntri ha kane ka sorkar MDA-2.
Haba kylli halor kane mynta ka sngi, u bah Metbah ula ong ba um kwah ban kren eiei ia ka jingkren ki briew shabar ka party ia ki kam ka party.
U la ong ba kino kino kiba don ka jingeh, ka jingsngew, ki dei ban kren hapoh ka party, ym ban kren shabar.
Lah ban kdew ba dang shen, u bah Paul uba la shah pynhap shuki myntri sorkar na ka bhah ka UDP, ula pynpaw ba ka jingleh ka party ka long ka bym sngew tynnad namar ba kam don kano kano ka jingiakren ia kane ka kam hapoh ka party.
U Bah Paul ula kynthoh ruh ba saw sngi shwa ban jia ka jingbujli shuki, u President ka UDP ula kren shai ba kam don kano kano ka jingbujli shuki na ka UDP hynrei ka long pat da khongpong.
Ki riew sain pyrthei kila kdew ba ka jinglong jingman hapoh ka party UDP kam long kaba iaid beit bad ka lah ban don ka jingbthei ha kine ki sngi khamtam hadien ba u bah Paul bad u bah Kyrmen Shylla kila shah pynhap shuki noh bad ha jaka jongki, la bujli da u bah Metbah Lyngdoh bad u bah Lahkmen Rymbui.
Ka jingiapyni nia u bah pual bad bah metbah|ki dak pei ka bom?
