Shillong: Ka KSU Khliehriat Circle ryngkat bad ka seng ki nongrep jong ka Elaka Nongkhlieh East Jaintia hills district mynta ka sngi ki la pynpaw ia ka jingpyrshah ia ka jingsngap paidbah ne public hearing ka ban long ha ka 19 tarik mynta u bnai Nohprah 2025 halor ka jingthmu ban tei ia ka Shree Cement Limited ha ka shnong Daistong East Jaintia hills district.
Kila aiti ia ka dorkhas ha u CEM ka JHADC u bah Thombor Shiwat bad buh jingkylli kumno u bar jylla u ioh ban thied jaka hapoh u pud u sam ka District Council bad hato ka District Council kam don jingtip eiei ia kane. Kane ka pynpaw ba ka sorkar kam khein snep shuh ia ka District Council mynta.
U bah Streamly N.Suchen u President KSU Khliehriat Circle u la ong ba ka seng ka la pyrshah ba lada ailad ban seng karkhana ha katei ka thain, ki umbam umdih kin sa rngad noh bad ki pynthor kba ki jah noh. U CEM u la kular ban tohkit ia kane bad lada ka poi sha ka miej ka Council yn pynsangeh iakane ka jingthmu.
Ha kane ka sngi, ka seng ka la kynduh ruh ia u DC ka East Jaintia District ba un tuklar ban ym iaid sha khmat ia ka public hearing. Hynrei na ka liang u DC u la jubab ba un sa rah sha ka Meghalaya State pollution control board bad sha ka State Environment Impact Assessment Authority ban shim iaka rai ba khatduh.
Ka seng ka kyntu ba ki paidbah nongshong shnong ka Daistong ba kin ieng rangbah, ym ban long kum u Iso ha ka Bible uba iapeiñ ia ka hok longtrai daka jingtah syrwa tang namar ba u thngan.
Wat long kum u Iso ban iapeiñ ia ka hok tang namar ka jingtah syrwa:KSU
