Shillong: Ka Meghalaya State Council of Contractor & Suppliers Welfare Association (MSCCSWA) ki la dawa ba ka sorkar jylla kadei ban phiah ia ki tender kiba heh, khnang ba ki kontraktor trai jylla ruh kin ioh lad ban pyntrei ia ki kam ha ka jylla.
U President ka MSCCSWA u bah Banshai Marbaniang ryngkat ka jingdonlang u Vice President bad Secretary u bah R Kurabah, ki la kam ba ka sorkar jylla ka la lehbein ia ki kontraktor jylla namar ba kino kino ki kam kontrak baheh ha ki tnad sorkar, ka sorkar ka ai da ki tender baheh, khlem phiah shuh bad kane ka long kumba ailad ban trei tang ia ki briew ba nabar.
La kynnoh ba ka sorkar mynta ka la kylla long ka sorkar jong ki kompeni, na bynta ki kompeni bad ia u kompeni.
Haba iadei bad ka jingpyntrei ia ka Jal Jeevan Mission (JJM), u bah Banshai ula ong ba bun ki kontraktor trai jylla ki la pyntrei shakhmat ia kane ka kam, hynrei kaba sngewsih ka long ba haduh mynta ka sorkar kam shym la pyllait ia ka Bill.
KA MSCCSWA ka la dawa ba ka sorkar jylla kadei ban pyllait noh ia ki Bill mardor ha shwa ban kut une u snem bad la byrngem ruh ba lada kim lah ban pynurlong, kim banse ban mihkhmat ban pyllong da ki jingiakhih.
Lehbein ka sorkar ia ki kontraktor trai jylla, ai kam tang ia ki kompeni:MSCCSWA
