Shillong: U Myntri Rangbah ka jylla Conrad K Sangma ha ka 10 tarik Nohprah 2025, Balang, ula plie ia ka Cultural and Tourism Amenities ha ha Lum Pomblang bad ha Madan Syiem, Smit ka Hima Khyrim, ha Smit ha ka jingdon lang u Symbud Myntri Rangbah bah Prestone Tynsong, u CEM barim bah Pyniaid Sing Syiem, u Syiem Khyrim Dr. Balajied Sing Syiem bad kiwei.
Kawei pat ka dei ka prokram ha Umphyrnai ha kaba ka la don ka jingrakhie ia ka jingdap 75 snem ka LP skul Umphyrnai Presbyterian School, ha kaba la long kongsan hi u Conrad Sangma bad symbud kongsan u MLA barim bah Lambor Malngiang katba u MLA ka thain u bah Ardent um shym la shah khot satia.
Ym lah ban tip na kaei kaei ka daw ba kim khot ia u MLA lajong hynrei kane ka rukom leh, ka pyni ba ka sorkar MDA-2 ka la shun thlong mluh thlong sying ia u President ka VPP haduh ba kim khot shuh tang ha ka prokram ruh.
Ia kane la ioh ban pynthikna na u bah Ardent uba la iathuh ba kam shym la don kano kano ka jingkhot ia u sha kine ki prokram watla u dei u MLA ka thain.
Ha ka video kaba ula pyllait ha social media, u bah Ardent ula ther ia kane ka policy thymmai ka sorkar MDA kaba ialam ka NPP ba ia kino kino ki skhim ne projek, ba ka sorkar ka ai sha ki shnong ne ki hima, ka sorkar lyngba ki tnad treikam jongka, kin leit ban plie, ban pyniaid ia ka prokram bad kane ka la pynhiar dor ki shnong ki hima namar ba ki long tang kum ki nonglum briew namar ka jingkwah burom palat ka sorkar.
Ka long ruh kum u briew uba riew spah uba leit rah syiar sha iing kiba duk ban ai ba kin shet bad ynda ka la ih, kim don bor ban iasam hi hynrei dei uta uba riew spah un sam mat katno dkhot ki dei ban ioh.
Paw ka jingshun thlong mluh ka sorkar mda-2 ia u bah Ardent|ki prokram ha Nongkrem konstitwensi ruh kim khot shuh
