Shillong: Ka lympung ka Seng Khynnah Seng Khasi Riwar Mihngi kaba 16, ka la kut ha shnong Maw-ah, kaba hap ha Raid Wahkhen hadien ar sngi kynthih mynta ka sngi ka 7 tarik Nohprah 2025.
Ha kane ka lympung, ki khynnah seng Khasi na ki tnat seng bapher bapher kiba hap ha ka Riwar, kila wan iashim bynta shit rhem katkum ka jinglong tynrai.
Haba kren ha kane ka lympung, ka longkmie kong Roberti Khongji, ka la ong ba kawei ka daw kaba ki Khasi kiba don ha ka niam tynrai ki shah pynkylla niam, ka dei na ka shongkha shongman bad kiwei ki jingngeit niam.
Ka la ong ba bunsien u shynrang ne ka kynthei kiba don ha ka niam tynrai, haba ki iashoh jingieit bad ki bym dei na ka niam tynrai, ki shah tan noh ia ka jingngeit niam sha kawei ka jingngeit bad kane ka dei namar ba kim skhem ha ka pyrkhat pyrdain.
Ka la ong ba kito ki shynrang kiba kylla niam da kaba bud ia ka kynthei, ka pyni ba um don ka jinglong rangbah kaba skhem, ka jingsynjor ka tynrai namar ba um don ka nongrim bad ka dei ka jingleh rain. “Lada ka kynthei ka kylla sha ka niam jong kiwei, ka ong ba ka bud ia u shyrnang hynrei haba u shynrang u leit bud ia ka kynthei, ka dei ka jingsynjor ka jingmut jingpyrkhat bad ka tynrai jongu, um don nongrim halade”, la ong ka kong Roberti.
Ka la bynrap, “Lada u shynrang um lah ban pynskhem, ban bat ia ka niam ka rukom, te mano pat ban bat ban hikai, uba dei u khlieh ka iing ka sem bad kane ka mut ba ka iing ka sem ruh ka la synjor lypa”.
Kane ka lympung ka long ban ai ka jingpynsngewthuh ia ki kmie ki kpa ba ki dei ban shim khia ban hikai ia ki khun ym tang ia ka tynrai hynrei ban ri ia ka akor ka burom bad ka tip briew tip blei.
Da ka shongkha shongman, shah tan kiba don niam tynrai
