Shillong: Ka Khasi Students Union (KSU) hynne ka sngi u Blei ka la pyllong ia ka jingialang kynmaw burom ia ka lyngkhuh sngi iap ba 31 snem jong u Bah Bull.N Lyngdoh da kaba buh syntiew ruh ha u motdur jong u bah Bull ba ieng ha Malki bad ka jingsngap jar ba shi minit kum ka dak ban kynmaw burom ia une u nongialam ka seng.
U President Rangbah ka KSU u bah Lambokstar Marngar haba kren ha kane ka sngi, ula pynkynmaw ia ki kam ba radbah ba la noh synniang da u bah Bull na bynta ban iada ia ka ri bad ka jaidbynriew. Ula ong ba mynshwa ha ka por ba u bah Bull u iakhun ia ka jaitbynriew, ki kren bein ia u hynrei ynda ula iap, ki pyrto.
Ula ong ba ka kam jong ka seng ka long ban aiti met bad mynsiem ban iakhun na bynta ka jingshong shngain ka ri bad ka jaidbynriew baroh kawei.
Katba na ka liang u Vice President ka KSU u bah Biangbor Paliar, ula ong ba u bah Bull udei uwei na ki nongmait lynti ban iakhun pyrshah ia ki mynder ri ha ki por ba ki thmu ban thombor ban knieh ia ki shnong ki thaw ki jaka puta ha kane ka ri.
Ha kajuh ka por, u bah Paliar ula pynkynmaw ia ki jingdawa ka seng kiba dang sahteng haduh mynta kynthup kum ka Inner Line Permit (ILP) hynrei kaba sngewsih ka long ba ka sorkar ha u 2020 ka wanrah pynban ia ka ain ka bym don bniat ka Meghalaya Identification, Registration (Safety & Security) of Migrant Workers Act, 2020.
Ha kane ka sngi la donlang ruh ki bahaiing hasem jong u bah Bull bad la ioh ruh ia ka jingkren na u General Secretary ka KSU WKH u bah Franklin Syiemiong, u President KSU Malki unit u bah Iashah Mukhim, u President KSU Nehu Unit, Robin Nongrem nalor kiwei de.
Ki iaroh ia u bah Bull ynda ula iap, ki bein ki khoh ha ka por ba u dang ialeh: President KSU
