Shillong: Ka seng Hynniewtrep Youth Council (HYC) ka la byrthen ba kan shim hi ia ki sienjam wat ban khot lang ia ki paidbah ban leit kyndang hi noh ia ka jaka sah ki briew ha Lum Surbe hadien ba ka bor sorkar bad ka Defence Estate kim leh eiei wat haduh shi snem ba la dep ujor ka seng.
Haba kren mynta ka sngi, u President ka seng HYC bah Roykupar Synrem ula ong ba lada dei ia ki Khasi, ka sorkar ka la dep kyndang wut wut hynrei ula buh jingkylli, balei kam leh eiei ia kitei ki briew kiba shu wan sah beain ha katei ka jaka, ha kaba ka seng kala dep ujor la shi snem mynta.
Ula ong ba naduh mynshem snem, ka seng ka la lap ba kumba 80 ngut kiba shong beain ha Lum Survey bad la thoh sha ka sorkar ban weng noh ia kine kiba shong beain ha katei ka jaka ka Cantonment Board.
La dep pyllong ruh ia ka jingjurip bad ka bor district ban shim kyrteng ia kiba sah ha katei ka jaka bad ka la shim kyrteng ruh ha kaba ka bor district ka ong ban beh hynrei la shi snem tam khlem pat leh eiei.
Katei ka jaka ka dei ka ktem drok ia ka jylla ha kaba la iohi man ka sngi ki pulit ka Anti Narcotic Task Force (ANTF) kiba lap ia ki briew ba khaii drok bad kiwei ki kam beain.
U bah Roykupar ula ong ba ka seng kam lah shuh ban shu sngap ban shu peit ia ka jingleh mynthi ka sorkar bad ka Defence Estate bad ka jingleh ka long kumba ai mynsiem ban kharoi ki kam sniew ha Shillong. U la ong ba ki ong ba ka kam ka don ha Kashari hynrei ynda la wad, la mih sa kawei ka jingpynkyllain ia kane ka kam bad ka sorkar ka dang wad ia u pud u sam hapdeng ka sorkar jylla bad ka tnad Defence Estate.
U la ong ba katei ka jaka ka long ruh kum ka jaka khaïi ia ki marjot bad kitei ki briew kila ioh ne em ia ki kot ki sla bad ula byrthen ba lada ka sorkar jylla bad ka Defence Estate kim shim kam ban weng ia kitei ki briew na katei ka jaka kiba shu shongthap, ka seng kan shim kam hi dalade ryngkat ki paidbah ba kitei ki briew ki dei ban mih.
Da dei ia ki Khasi la dep kyndang wut wut| byrthen ka HYC ban kyndang hi ia kiba sah beaiñ ha Lum Surbe: HYC
