Shillong: U myntri ka tnad PHE ka jylla u Marcuise N Marak ula ong ba ka jingsah teng ka pisa ban siew ia ki kontraktor kiba pyntreikam ia ka skhim Jaal Jeevan Mission (JJM), kam dei tang ha Meghalaya hynrei ha baroh kawei ka ri India.
Haba kren mynta ka sngi, u Marcuise ula ong ba ki don shibun ki daw halor kane bad kawei ka dei namar ba ka sorkar India ka kwah ban pynjlan ban pyndep ia kane ka skhim JJM sha u 2028 bad ka la bthah ban pyrkhat biang ia ka jingpyllut kiba la tam ia baroh ki kam kiba pyntreikam ia ka JJM.
U myntri ula ong ba ka la bthah ruh ban leh da ka Geo tagging ia baroh ki skhim ka JJM.
Katkum ka jingong u myntri, ka jingsah ka bill ka la kot sha kumba 2000 klur kiba dang sah ban ioh pisa hynrei kaba dei ban siew ia mynta ka la kot sha ka 700 klur ha ka Meghalaya.
U myntri ula ong ruh ba ka sorkar India ka la bthah ruh ba ka jylla kaba la ioh ia ka pisa na ka sorkar India, ka dei ruh ban sei ia ka bhah lajong bad ka Meghalaya ka hap sei kumba 700 klur.
Ha kane ka aiom Khristmas khamtam ba ka Meghalaya ka dei ka jylla Khristan, u la ong ba ka dei ka kamram ia ka sorkar ban pyllait ia ki Bill bad ka sorkar ka la kyrpad ia ka sorkar India ban pyllait noh ia ka pisa bad ban leit iakynduh wat ia u myntri rangbahduh ka ri ruh halor kane.
Halor ka jingkyrduh um ha sor Shillong, u myntri ula ong ba ka lah ban dei namar ba ka Greater Shillong Water Supply Sscheme (GSWSS) Phase III ym pat pyntreikam watla dep ban test bad ula kyrmen ban ym kyrduh um shuh hadien ba la dep pyntrei ia ka GSWSS Phase III.
Ka Bill JJM ka don 2000 klur, kaba hap ban siew T.700 klur| ym dei tang ha Meghalaya hynrei baroh India kim ioh pisa, ong u Myntri ka PHE
