Shillong: Katkum ka jingong ka DCPO ka jylla Karnataka, ka jingwanrah noh ia ki khynnah kiba na Meghalaya kiba pule ha Karnata ka dei namar ba la ioh jingujor bym biang ka jaka sah, ka bam ka dih nalor ba ha skul la hikai da ka ktien Kannada.
Haba kren mynta ka sngi sha ki lad pathai khubor, ka B. Nautaj, ka DCPO ka Chikkaballapura District, Karnataka, ka la ong ba la rejister ha ka ain ia ki bor pyniaid ka skul ba ki sah kine ki khynnah bad ia kiba ialam ia ki.
Hynrei ka la ong ba ym lah ban iathuh ia kiba ujor namar ba ka dei ka kamram ban buhrieh ia ka kyrteng jongki.
Ka la ong ba la ioh jingujor na u child helpline number 1098 ba ki khynnah kim sngewthuh ba hikai da ka ktien Kannada, nalor ba ka jingbam ruh kim long kiba koit kiba khiah.
Ia kine ki khynnah kiba don 24 ngut la wanrah mynta ka sngi ha Shillong da ar tylli ki bos rit, ha kaba la don ka jingpdiang ia ki ha ophis ka Social Welfare, ryngkat ka jingdon ka Chairperson ka Meghalaya State Commission for Protection of Child Rights ka Agatha Sangma, ka Director ka kong Doreen Lyngwa bad ki kmie ki kpa bad kiba haiing jong kine ki khynnah.
Ha kawei ka liang, ka Chairperson ka Meghalaya State for Protection of Child Rights Commission ka Agatha K Sangma ka la ong ba ia ki khynnah na kane ka jylla, la ialam da ka seng kaba la tip kum ka Lei Synshar Cultural Society.
Haba kren mynta ka sngi, ka la ong ba ka Commission kala khot hajir ia ki ban pan jingshai halor kane. Ka Agatha ka la ong ba ha ka jingmut jongki ka long ban leh ia kaba bha hynrei ynda kila poi sha katei ka jaka pat kam long kumba ka dei ban long.
Ka Agatha kala ong ba halor kane ka jingjia, ka pynkhreh ia ki kyndon ne ki Standard Operating Procedures (SOP) ba kito kiba ialam ia ki khynnah shabar, ki dei ban bud ia ki kyndon thik pa thik, ban lait na kano kano ka jingeh.
Lah ban kdew ba 24 ngut ki khynnah na Meghalaya la pynphai na Chikkaballapura District, Karnataka mynta ka sngi.
Kine ki khynnah ki leit pule na kane ka jylla Meghalaya ban leit pule sha katei ka jylla.
Ha ki bnai ba la dep, 2 ngut ki khynnah kiba pule ha katei ka jylla, kila khlad hadien ha kaba la suba jur ba la sniew ka bam kaba la ai ha ki ha katei ka jaka sah jongki.
Ia kine ki khynnah la ialam ha ophis ka Social Welfare Department da ka ar tylli ki bos na Guwahati kiba wan da ka liengsuin na Karnataka.
Wan phai 2 bos ki khynnah, ka bam kam biang, ki hikai ktien Kannada, la ioh jingujor, ong ka ophisar na Karnataka
