Shillong: U myntri rangbah ka jylla u Conrad K Sangma ula kam ba ka ioh ka kot jong ki longkmie ka la kylla bak ly bak ha kane ka jylla lyngba ki Self Help Group (SHG).
U Conrad ula plie ia ka iew die ia ki mar ki mata jong ki SHG kaba hynniew mynta ka sngi ha phyllaw U Soso Tham Auditorium, Shillong ha ka jingdon lang u myntri ka tnad nongkyndong bah Sosthenes Sohtun bad kiwei.
Haba kren ha kane ka prokram, u Conrad ula pynpaw ia ka jingkmen ia ki longkmie kiba la trei shitom ban kyntiew ia ka ioh ka kot ha ka jylla.
U la ong ba ka thong ba kongsan ba ka sorkar ka la kyntiew ia ki self help group kiba la poi sha ka 55,000 tylli, kam mut ban kyntiew ia ka kamai kajih hynrei ban pyllait im ia ki longkmie na ki jingma khamtam haba ki kha khun namar haba kila kiew ha ka kamai kajih, ka la pyllong ia ki ban ioh ia ka bam ka dih kaba kham bha, bad kiwei ki jingdonkam ha ka longbriew manbriew.
Ula kam ruh ba ka jylla Meghalaya ka wan baar ha ka jingkiew sted ha ka ioh ka kot napdeng ki jylla ha ka ri.
Ha kane ka sngi, ula sam khusnam ruh sha ki village organisation, bad ki syrnod sha ki 15 ngut ki volunteer kiba la aiti ialade ha ka Har Ghar Tiranga Campaign bad kumjuh la sam ki Cold Chain Box bad kiwei kiwei.
Palat 60 tylli ki Self help group na kylleng ka jylla ki la wan iashim bynta ha kane ka iew kaban kut haduh 10 tarik.
La kylla dur ka ioh ka kot ki longkmie na ki 55 hajar ki SHG, ong u Conrad
