Shillong: U myntri ka tnad ka koit ka khiah ka jylla u bah Wailadmiki Shylla ula ong ba ka long kaba sngew khia lada ioh sngew ia ka jingshah kynthoh ka Civil Hospital, Shillong.
Dang shen, la kynnoh ba ka bor ba dei peit ka Shillong Civil Hospital ka la leh torti ban ai jingsumar ia ki ar ngut ki samla pule ka NEHU kiba aksiden haduh ba la pynkit noh sha Nazareth Hospital na Civil Hospital ban ai ka jingsumar kaba sted.
Haba kren mynta ka sngi, u bah Wailad ula ong ba ula iakren ia ki doctor bad ka jingtohkit ka dang iaid ban wad ia ka jingshisha. U la ong ba ki don shibun halor kane bad hap ban ngam jylliew halor kane, kiei ki daw kiba pyllong bad kum u myntri kam long ban ai ka jingbishar ha kane ka por.
Lah ban kdew ba ka Meghalaya Human Rights Commission ruh ka la pan jubab na ka tnad ka koit ka khiah ka jylla halor ka jingshah kynnoh ba pynslem ban ai ka jingsumar ia kine ki samla pule bad ka la phah tohkit bad wanrah ia ka kaiphod shwa ka 7 tarik mynta u bnai.
Sngew khia, dang tohkit halor ka jingkynnoh leh torti ka Civil Hospital, ong bah Wailad
