Shillong: Ki samla pule ha Assam ha thain Bodoland kila tur puk sha secretariat ka Bodoland Territorial Council (BTC) ban pyrshah ia ka jingthmu ka bor sorkar ban ai kyrdan Schedule Tribe (ST) ia ki 6 tylli ki jaitbynriew ha katei ka jylla.
Kine ki samla kila leit tur puk sha katei ka ophis ha kaba kila kiew na kynroh ruh bad pyrta shla ban pyrshah ia kane ka jingthmu ka sorkar. Ka la don ruh ka jingkhang lad ki bor pulit hynrei kim shym la lah satia bad kila ioh rung shapoh ka Secretariat ka BTC.
Ka jingiaid ka la sdang na Bodoland University shaduh Bodoland Territorial Council (BTC) Secretariat ha Kokrajhar, ha kaba kila kynnoh ba ka sorkar ka la pynhiar dor ia ki jaitbynriew Bodo bad buh jingma ia ka hok sain pyrthei, ka pule puthi bad ka ioh ka kot jongki.
Ka jaitbynriew Bodo bad kiwei kila pyrshah ia ka jingthmu ka sorkar Assam ban ai kyrdan schedule tribe ia ki jaitbynriew Tai Ahom, Chutia, Moran, Matak, Koch-Rajbongshi bad Tea Tribe. Ki sngew ba kane ka rai kan pynduh ia ka bhah bad ki jingmyntoi jongki ha ki kam sorkar, bad ka kam nongmihkhmat sha dorbar thawain.
Puk tur ki samla sha ophis ka BTC ha Assam ba ai kyrdan ST ia ki 6 jaitbynriew
