Shillong: U MLA ka Mawsynram u bah Oland Sing Suin ula ong ba ka sor Shillong ka donkam ia ki surok suin ne flyover kum ha ka thain Polo, Anjalee ban pynduna ia ka jingsahkut kali.
Haba kren mynta ka sngi, u bah Suin ula ong ba ynda la treikam ka sor Shillong thymmai ruh kan pynsting ia ka sor Shillong barim na ka jingsahkut kali.
Ka sor Shillong ka dei kaba jur bha ka jingsahkut kali ha kine ki sngi, kaba la wanrah ka jingthut ka leit ka wan bad ka jingiabeh ban pyndep ia ki kam ki jam.
“Katto katne ki surok suin, ki donkam ban shna ha sor Shillong kum ha thain Polo, Anjalee bad kiwei ki jaka ban pynduna ia ka jingsahkut kali”, la ong u bah Suin bad bynrap, “ynda la treikam ka sor Shillong ba thymmai, kan iarap ban kham pynsting ia ka jingjur ka jingsahkut kali”.
Ha kajuh ka por, u bah Suin ula ong ba ka State Planning Board ka dei tang ka nongai jingmut halor ka jingpyntreikam ia ki skhim hynrei kam lah leh eiei bad kaba kut ka shong beit ha ka sorkar.
U bah Suin uba dei ruh u dkhot ka Planning Board, u la ong ba mynshwa, la don ka jingiathir bad ka jingleit jurip ia ki jaka kiba kham jur bha ki jaka ba sahkut kali ha kaba ka Board ka la ai jingmut sha ka sorkar ban pynsting ia ka jingsahkut.
Donkam surok suin ha Polo, Anjalee ban pynduna sahkut kali ha sor, ong bah Suin
