Shillong: U MLA ka Nongkrem uba dei ruh u President ka Voice of the People Party (VPP) mynta ka janmiet ha Khyndai Lad ban iakynduh ia ki nongtyrwa die sha, die soh ha kriah ha shang, kiba la shah beh ha ki briew ka Shillong Municipal Board.
Kane ka jingwan u bah Ardent ka long hadien ba kine ki briew kila shah beh na thain Khyndai Lad ba kim bit ban tyrwa die jingdie shuh namar ba ka dei kaba la mana.
Haba kren hakhmat jongki, u bah Ardent ula ong ba ka jingwan jongu, ka long ba hadien ba la iohi ba ka jingleh ka sorkar ka long kaba palat ban beh ia kiba iaid tyrwa. Hynrei ha kajuh ka por, u la ong ba kim dei pat ban pynwit ia ki briew, ka iaid ka ieng ki briew, namar ba ka seng kam pdiang ia kata.
Ula ong ba lada ka sorkar ka leh jubor, yn sa peit pat. U la ai mynsiem ym dei ban iapait para jaitbynriew hynrei ban iatylli lang, ym ban shah ialam bakla.
Na ka liang ki ophisar kiba iakren bad u bah Ardent, kila pynshai ba ka jingbym shah ban die madan naduh kiba shu tyrwa ha katei ka thain, ka dei namar ba kila ioh ia ka hukum ka High Court, Meghalaya ha kaba ka sorkar jylla ka hap ban pyntreikam ia ka.
Heh mynsiem kiba tyrwa sha, tyrwa soh ba wan ai mynsiem u bah Ardent ha Khyndai Lad
