Shillong: Ka jingiapyneh mar kylliang hapdeng u Lyngdoh ka Raid Mylliem ryngkat ki khun ki hajar bad ki myntri ka Hima Mylliem halor ka jingpyndep ia ka niam ka rukom ha Iewduh, ka la poi noh sha ka jingiasuk.
Ha ka jingialang mynta ka sngi, kine baroh ar liang, kila rai ba mynta u snem, ia ka jingleh niam yn pyndep u Lyngdoh ka Raid Mylliem ryngkat ki khun ki hajar hadien ba kila sdang na Mawnarian, Lum Shyllong bad kin pyndep ruh haduh Iewduh. Ha kane ka jingiakren, la don lang u Syiem ka Hima Mylliem ruh kaba long ha ophis u Syiem ha Mawkhar, Shillong.
U Lyngdoh ka Raid Mylliem, Hima Mylliem u bah Korshon Lyngdoh Marbaniang haba kren hadien ba la wai ka jingialang, u la pyntip ba la iasuk halor kane bad la rai ban aiti ban pyndep u Lyngdoh bad ki khun ki hajar ia ka jingleh niam ha Iewduh bad la pynbeit ba kan long ha ka 4 tarik Nohprah 2025.
U la ong ba katkum ka rukom, shisien ba la sdang ban leh ia ka niam ka rukom na Mawnarian, Lum Shyllong, dei ban pyndep haduh Iewduh ruh.
U Lyngdoh ula ong ba ia ka niam ym lah ban shu ieh namar bah aba im ka niam, im ka jaitbynriew bad la kyntu ia ki khun ki hajar, ki nongshong iew, ba kin wan ban sakhi lang ha katei ka jingleh niam kaban long ha ka 4 tarik Nohprah.
Lah ban kdew ba ia ka jinglehniam ha Iewduh la buh ban pyllong ha ka 18 tarik Naiwieng 2025 hynrei namar ba ka don ka kynrum kynram, ka KHADC ka la pynsangeh noh shwa khnang ban lait ioh mih kano kano ka jingjia bym sngew tynnad.
4 tarik Nohprah yn pyndep ia ka jingleh niam ha Iewduh, ba la iasuk noh ki arliang mamla
