Shillong: Ha ka shi snem kumba 4 klur tam ei ei ka pisa nabar ri ka la wan sha Meghalaya lyngba ki 37 ngut eiei ki Nurse kiba trei shabar ri kynthup ha Japan bad Singapore.
Ia kane la iathuh u myntri rangbah u Conrad K Sangma haba kren ha ka jingialang plie ia ka CFI (Caring for India) Centre ha Nonglum, Umroi, Ri-Bhoi ha ka 22 tarik Naiwieng 2025 haka jingdon lang u MLA ka thain bah Damanbait Lamare, u chairman ka MIDC u James K. Sangma bad kiwei.
Katkum ka jingong u myntri, kine ki Nurse kila ioh ban phah pisa sha ki ïing jongki kumba 1 lak man u bnai bad haka shi snem ka jingwan ka pisa sha Meghalaya nabar ri lyngba ka foreign exchange ka la kot sha ka 4 klur tam.
Ula ong ba ka sorkar jylla kan sa phah sa kumba 2000 ngut ki Nurse ha ki snem ban wan kynthup ha ki ri Europe kum sha Germany.
Ula iaroh ia ki nongseng jong ka CFI Centre kaba ai ka jingsain dur ia ki samla ha kane ka bynta bad ula pynsngew ba ka sorkar kan ai shuh shuh ka jingkyrshan ia ka jingthmu jong ki bor pyniaid ban plie sa ia ka Nursing College.
Kiwei kiba kren ki kynthup ia u MLA bah Damanbait Lamare, u
CFI Leader u Dr. Shaji Thomas bad kumjuh u CFI Board Member u P.J. Matthew.
Ka CFI ka dei ka trust ki Khristan ban ai ka jingshakri ia ka imlang ka sahlang.
Na ki 37 ngut ki Nurse na Japan, Singapore poi ka pisa sha Meghalaya T. 4 klur tam shi snem
