Shillong: U myntri ka tnad ialehkai ka jylla u bah Wailadmiki Shylla ula pynpaw ia ka jingsngew khia bad bynniaw namar ba ki samla ha kane ka juk mynta, ki bunkam ban ialehkai phutbol ha mobile, ym ha madan ialehkai.
Mynta ka sngi, ka 22 tarik Naiwieng 2025, u bah Wailad ula plie ia ka madan futsal, basketball court, bad ka jingpynitynnad ia ka madan ha Mawprem ryngkat ki MLA kynthup u bah Paul Lyngdoh bad u myntri barim bah Shakliar Wajri.
Haba pynpaw ba ka jylla Meghalaya ka dei kaba dang samla bha namar ba kumba 60 percent ki nongshong shnong ki dei kiba hapoh 35 snem bad dei na kane ka daw, ba ki briew ki kthong bha ban wanrah drok sha kane ka jylla ban pynjot ia ki samla.
Halor kane, ka sorkar ka la wanrah shibun ki lad ki lynti ban plie lad ia ki samla ba kin lait na ki jingsniew ba ha rukom bad ula kyntu ia ki samla ba kin sangeh ban ialehkai ha Mobile hynrei ban wan sha madan.
U la ong ba ka sorkar ka la mynjur ia ka polisi ha kaba kito kiba wanrah khusnam na ka national bad international kin ioh rung kam bei sak ha ka sorkar khlem da donkam ban ialeh ia ki eksamin.
Kiwei kiba kren ki long u MLA ka thain bah Paul, u bah Shakliar bad ki nongkitkam ka shnong Mawprem.
Ki samla mynta ki ialehkai phutbol ha mobile, ym ha madan, Bynniaw u bah Wailad
