SHILLONG 17, Jymmang: U President ka Voice of the People Party (VPP) u bah Ardent M Basaiawmoit mynta ka sngi ula iawer ia ki paidbah ban wan sakhi ia ka rai ban shim ka sorkar halor ka roster system bad ka Reservation Policy ha ka 19 tarik Jymmang.
Ka sorkar ka la khot ia ka jingialang jong baroh ki seng sain pyrthei ha ka sngi Thohdieng ban iathir ia ka roster system hadien ba ka la don ka jingiakhih bad dawa khamtam na ka VPP ban pynbeit noh namar ba ka don jingdkoh.
Haba kren ha ka jingiashong kyraiñ ha phyllaw ka Additional secretariat mynta sngi, u bah Ardent ula byrthen ruh ban pynjur ia ka jingiakhih lada ym ioh ia u soh kumba la khmih lynti.
“Lada ka jingmih na ka jingialang kam long kaba hun, ngin pynjur ia ka jingiakhih nangne shakhmat”, la byrthen u bah Ardent uba la ieng ban kren na Gypsy.
Ha kane ka jingialang, u la kyntu ba ha ka sngi Thohdieng, ki paidbah ki dei ban iawan khnang ban ap ha surok ka Secretariat ia ka jingpynbna na ka sorkar khnang ba kan tip ba ki paidbah ki kyrshan halor ka jingdawa ka VPP halor kane ka mat.