Shillong: Ka myntri ka tnad ka koit ka khiah ka jylla ka Kong Ampareen Lyngdoh ka la pynpaw ia ka jingsngew hun mynsiem jrut ba ka Shillong Medical College kaba la angnud la bun phew snem ka la urlong mynta.
Haba kren mynta ka sngi, ka 3 tarik Nailur 2025, ka kong Ampareen ka la ong ba ka college kan sdang klas noh mynta u snem hi bad ka jingsdang kan long ha une u bnai Nailur.
Ka Shillong Medical College ka la urlong hadien kumba 50 snem tam ba ka jylla Meghalaya ka la ioh ia ka jylla lajong.
Ka Shillong Medical College ka la ioh ia ka jingithuh na ka National Medical Commission (NMC) bad yn sdang ia kane ka college mynta u snem ha kaba yn shim 50 ngut ki khynnah, 80 percent kan iaid sha ki nongshong shnong ia ki jylla, bad 15 percent ia ka bhah ha ka ri.
Ka kong Ampareen ka la ong ba ka la sngew kmen ruh ba la don ki doctor na kane ka jylla kiba la wan phai sha ka jylla ban trei ha kane ka SMC.
Kane kan plie lad ruh ia ki doctor na kane ka jylla kan plie lad ba kin pyntbit shuh shuh, na ka bynta ban shakri ia ki paidbah.
Ka la ong ba u Myntri Rangbahduh ka ri u Narendra Modi un wan ban plie ka Medical college shen.
50 ngut yn sdang pule doctor ha Shillong Medical College, Yn wan plie u Modi
