Shillong: Kiba haiing ka khynnah kaba la kynnoh ba shah dung injek ha syndah ka Madan Student Jaiaw, kim pat treh ban kren eiei halor ka jingpynshai ki pulit halor kane ka jingjia.
Na ka liang ka bor shnong ruh kam pat kwah ban kren eiei namar ba ka don ha kti ka bor jong ka ain.
Hynrei na ka liang u Dr. Meban jong ka Dr. H Gordon Robert Hospital, Jaiaw ula iathuh ba ha ka por ba wan sha hospital kam da don kano kano ka jingipher hynrei ka kamram ki doctor ka long ban sumar haba wan ki nongpang. Bad hadien ba la mih na jaka sumar, ka la khlain bha.
U la ong b akum ki doctor kin sumar bad leh katkum ki kyndon bad dei ban wan test biang lai bnai haba dei kum kane ka jingjia. U la ong ba ka jingtohkit ka shong ha ki pulit bad ka kam ki doctor ka long ban shu sumar hynrei ki don ki jingtip ki bym lah ban iathuh.
Ha ka sngi Baar, u Superintendent of Police ka East Khasi Hills u bah Vivek Syiem ula pynshai ba katkum ka jingtohkit bniah ki pulit, ka jingkam ka khynnah skul ba ka shah dung da u thyrnia injek na tyrpeng jongka, kam shym la jia satia kumba la ujor ha ka ejahar.
Ha ka kyrwoh mynta ka sngi, u SP ula ong ba na ka liang ki pulit kiba la pyllong ia ka jingtohkit kila shem ba kam don satia ka jingjia ban shah dung thyrnia katei ka khynnah kumba la ujor ejahar hakhmat ka Bible Society, Jaiaw Shillong bad ia ka kaiphod halor kane, ki pulit kin sa aiti sha ka kashari.
Lah ban kdew ba ha ka 18 tarik Nailar, 2025 ki pulit ka Lumdiengjri kila ioh pdiang ia ka ejahar ba kawei ka khynnah kala shah dung thyrnia ha ki ar ngut ki briew kiba shong da ka scooty bad kah dur khmat. Halor kane, ki pulit kila shim khia ban tohkit hynrei ki la lap ba kane ka jingujor kam dei kaba shisha namar ba kam shym la don ka jingjia kumba la kdew ha ka ejahar.
Lah ban kdew ba kane ka jingmih khubor ba shah dung thyrnia ka khynnah skul, ka la wanrah ka jingsuhjer ia ki briew kylleng ka sor Shillong.
Ym pat treh kren kiba haiing ka khynnah| ka kam ki doctor ka long ban sumar, ka khlain bha por mih na hospital
