Shillong: U managing director ka MeECL u Sanjay Goel ula ong ba ha kine ki ar snem kam don eiei ka jingbuh por ban pyllip ding ne load shedding, hynrei ka jingpyllip, ka dei tang namar ba don ka jingshna ha ki jaka ba donkam ban maramot na ka jingsniew ki paia ne ki jingthut ki waiar.
Haba kren mynta ka sngi, u Sanjay u la ong ba haba don ka jingshah pynthut na ka jingkhyllem ki dieng ha ki waiar, haba bujli ia ki transformer, haba thung tymmai ia ki paia ilektrik bad ka don ruh ka jingpyllip ia ka ding tang haba shna pynthymmai ia ki power station kiba la rim bad kiba donkam ban pynkhlain ia ki tiar ki tar bad shwa ban leh ia kane, la ju pynbna paidbah lyngba ki lad pathai khubor sha ki paidbah kiban shah ktah na ka jingpyllip ding. Ka jingpyntip ka long lyngba ki mobile phone.
Ha kajuh ka por, ula ong ba ka sorkar ka dang wad ia ki lad ki lynti ia ki kompeni kiba tbit ha kaba iadei ban pyntreikam ia ka Pump Storage khnang ban tehlakam na ka jingkyrduh bording haba don ka jingdawa kaba jur.
U MD ka MeECL ula ong ba ka jingioh khajna thikna na ki nongthang ding ruh ka dei kawei ka mat kaba ju iakynduh jingeh bha. Ula ong ba watla ka kompeni MeECL ka la wanrah bad pyntreikam bun jait ki rukom siew da ki juk mynta lyngba ki online, hynrei ka jingioh lum khajna ka dang long kaba jwat bha.
Ym ju don jingpyllip ding shuh la ar snem, hynrei bun ki bym pat siew bai ding, ong u MD ka MeECL
