Shillong: Ka kynhun ki EM bad MDC jong ka KHADC ha ka jingialam u Bah Pynkhraw Kharjahrin, EM ka tnad Council Asset dang shen ka leit jngoh bad jurip iaki jingtei bapher bakher jong ka Khasi Traditional and Cultural Centre kaba don ha Jingkieng Kalong, hajan ka Pung Umiam.
Ha kane ka jingleit jngoh ka kynhun ka la lap ba ki jingtei baroh ki la i sepei namar ba ki jingtei kiba jan dep noh artad la sangeh noh kynsan kynsan bad namar ba la shu ieh kumto khlem bteng shuh ka jingtrei bad khlem sumar shuh, bun ki la jot noh bad kylla long pynban ki ktem jong ki kam awria bad kiwei de ki kam sniew kiba ktah ia ka jingshongshngaiñ.
Kane ka Centre ka kynthup ia ka Hall kaba don lang bad ki kamra. Nangta ka Restaurant, ki Cottage ne ki jaka sah kumba 10 tylli bad kiwei kiwei kiwei.
Ka don ka surok ruh ban rung sha kane ka centre na ka surok ba ki ju ong ka lynti rim. Ia ki jingtei la shna ha ka jaka kaba itynnad kaba don harud ka pung umiam,kaba dei ka jaka jong ka council.
La lap ruh ba ym tang ba ki jingtei ki la jot lut, hynrei ki don ruh ki bynta kiba dei jong ka Restaurant ki la ing.
Ha kane ka jaka kaba pyngngad kaba lah ban khring bha ia ki nongjngoh pyrthei la sop bad tap da u phlang uba palat shi ryngieng briew.
U Bah Pynkhraw u la iathuh bad ia kane ka Centre la sdang tei ha ka snem 2018 ha ka jingmang tyngka kaba 14 klur tyngka. Hynrei ka jingtrei ka la sangeh noh ha ka snem 2019. Ka daw ka jingsangeh noh ia ka jingtrei kadei namar ka jingujor mukotduma ka Meghalaya State Pollution Control Board..
T.14 klur shu sah ka hotel ka KHADC ha Jingkieng Kalong
