Shillong: Mynta ka sngi, kiba haïing hasem jong u samla Pynskhemlang Kharkhrang, 25 snem, kila mih mynta ka sngi ban leit wad ia u sha ka thain Mawdun kaba don shaneng ka pung Umiam bad kiwei ki jaka.
U Samla Pynskhemlang ula jah naduh ka 26 tarik Naitung ha kaba la iathuh ba ula ngam jyllop hapoh ka pung Umiam hynrei hadien bun taiew ba kiba haiing kila ap ban iohi ba lehse ka met jongu kan per ha sla um, hynrei khlem per satia.
Shwa ia kane, ka bor sorkar naduh ka SDFR, S&RT bad ki NDRF na Guwahati kila pyllong ia ka jingwad da kaba ngam shapoh ka pung Umiam hynrei kim lap dak satia haduh ba kin kynran dien noh.
Na ka liang kiba haiing kila ujor sha ki pulit ka Mawlai PS ba kin shimkhia ban tohkit bniah hadien ba kila don ka jingpyrkhat ba u samla Pynskhemlang u lah ban ym don satia ka met hapoh ka pung Umiam, bad kila iai ban ioh ia ka jubab kaba pynhun, hynrei ka long pynban kaba pyndiaw mynsiem ia ki.
Halor kane, hapdeng ka jingduk ruh, kim banse ban pyrshang katba lah ka bor ban leh da ka bor lajong ban leit wad ia une u samla uba dang jah haduh mynta.
Wad hi ki kiba haïing ia u samla Pynskhemlang sha thain Mawdun
