Shillong:U nonghikai ba la rangbah uba dei ruh u President barim ka Khasi Jaintia Deficit School Teachers Association (KJDSTA) u Babu Kular Khongjirem ula ong ba ka jingwanrah ka sorkar jylla ia ka Meghalaya Education Grant (MEG) kan wanrah pynban ia ka jingsniew ia ka pule puthi ha ka jylla.
Haba kren ha ka jingialang ki nonghikai skul All Primary School Teachers Association (APSTA) mynta ka sngi ha Shillong, u Babu Kular uba la wan ban ai jingkyrshan ia kane ka kynhun APSTA, u la ong ba ka sorkar kam dei ban wanrah ia ka Meghalaya Education Grants (MEG) hynrei ka dei ban wanrah da kawei ka rukom.
Haba ianujor ia u Purno A Sangma bam kwai ha duwar u Blei, uba dei u Myntri Rangbah barim ka jylla, bad u khun jong u, u Conrad K Sangma uba dei u myntri rangbah mynta, u Babu Kular u la ong ba ia ka Deficit system la wanrah nyngkong eh da u (L) Purno Sangma uba dei u kpa jong u Myntri Rangbah ba mynta u Conrad K Sangma ha u snem 1988 katba ynda la wan u khun (Conrad) mynta pat, u la sdang ban pynjot ia ki nongrim jong u kpa (Purno).
U la ong ba u Conrad u la dei ban sngewrem namar u kpa u la leh bha hynrei nang pynjot pat u khun.
Shwa ia kane, ki nonghikai APSTA kila pyllong ia ka jingiaid rally na thain Khyndai Lad, DC ophis, sha Polo shaduh Golflink ban pynsngew ia ki jingdawa jonkgi na ka sorkar ban pyrshah ia ka Meghalaya Education Grant (MEG).
Ka kpa u wanrah da ka Deficit, u khun da ka MEG kaban pynjot ia ka pule puthi, ong u Babu Kular
