Shillong: Ki District Council kim donkam shuh ban leit tied jingkhang man ka por na ka tnad Mining, Forest bad ka tnad Transport ban pyllait noh ia ka bhah jongki, hynrei naduh mynta ki shu leit beit ha District Council Affairs (DCA) lada ka bhah kam pat poi.
Ka jingialang ka kynhun myntri ne cabinet mynta ka sngi, ka la mynjur ban ai bor noh ha u Joint Secretary ka tnad DCA ia ka bor ban pyllait ia ka pisa kiba dei ki bhah jong ki District Council na ki tnad sorkar ba kynthup na ka Mining, Transport bad ka Forest.
U myntri rangbah ka jylla u Conrad K Sangma mynta ka sngi, ula pyntip ba ka cabinet ka la pynkylla ia ka rukom treikam khnang ban pynsuk ia ki District Council ban leit tang ha kawei ka tnad khlem da iaid kyllain jelebi kumba ju long ha kine ki snem kiba la leit. Mynshwa ki District Council kila hap ban mareh na kawei ka tnad sha kawei ban leit wad ia la ka bhah ban ioh na ka sorkar jylla bad kane ka la wanrah ia ka jingeh bad ka pynlut kai ia ka por, hynrei mynta kin shu leit beit sak sha ka DCA.
Ia kane ka jingpynkylla la leh katkum ka Meghalaya Financial Rules 2006 bad la ai bor ha u Joint Secretary ka DCA ban leh ia kane namar ba kane ka tnad kam don u khlieh jong ka tnad.
Ki District Council kin leit shim beit ia ka bhah na DCA
