Shillong: U Myntri Rangbah ka jylla u Conrad K Sangma ula sangeh kylla ia u nongialam liangpyrshah u Dr. Mukul Sangma halor ka jingkynnoh ba ka NPP kam lah siew ia ka tulop ki nongtrei ka Garo Hills Autonomous District Council (GHADC) haduh 42 bnai.
Haba kren mynta ka sngi, u Conrad ula kyntait ba ka NPP ka pynjot ia ka GHADC hynrei ula ong ba dei ha ka por ba synshar ka Congress mynshwa ba ka la pynjot thiaw ia ka GHADC.
U la ong ba ha ka por ba synshar ka Congress ka la thung kam lymmuh lymmain haduh ba la pynkit kulai bad bam hati ia ka Council. Ula ai nuksa ka Khasi Hills Autonomous District Council (KHADC) ka don tang 600 ngut eiei ki nongtrei katba ka Jaintia Hills Autonomous District Council (JHADC) ka don kumba 1800 ngut eiei katba ka Garo Hills Autonomous District Council (GHADC) ka don haduh palat 2000 ngut ki nongtrei.
U Conrad ula ong ba ka jingmih jong ka Garo Hills Autonomous District Council (GHADC) ka long tang 2 klur eiei haka shi bnai katba tang ka tulop pat ka jinglut ka la kot sha ka 5 klur eiei. U la ong ba ka KHADC pat ka pyllut tang kumba T.4 klur ha ka jingsiew tulop bad ka JHADC ka long T. 5 klur eiei.
Khnang ban pynbeit ia kane ka jingeh, ula ong mar synioh synshar ka NPP, ka la bthah ban sangeh mardor ban thung kam thymmai ha GHADC bad haduh mynta la lah ban pynduna sha ka 1300 ngut ki nongtrei na ka 2000 ngut tam.
Ula ong ba ka sorkar ka ai jingkyrshan ia ka GHADC ba kan leh ia ki kam jongka hynrei kiba bun la pyllut ban siew tulop bad la bun ki bnai ba la pynkhuid bad ki dang don ruh kiba sah namar ba kim ioh tulop ha ka por mynshwa ban wan ka NPP.
Pynbam hati kit kulai ka Congress mynshwa ia ka GHADC, ong u Conrad
