Shillong: Haduh 3149 tylli ki kes shah thombor pyrshah ia ki kynthei la wan rejistar ha ophis One stop Centre kaba don ha Ganesh Das Hospital, Shillong.
Katkum ka jingiathuh u Medical Superintendent ka Ganesh Das Hospital, kino kino ki kynthei kiba shah nion bein ha shwa ban ioh jingsumar la hap ban rejistar ha ka One stop centre.
Ula ong ba na ka liang ka hospital ka buh ia ki clinical physiologist kiban iarap ban ai ka jingiasyllok.
Ha kane ka One stop centre la rejistar ia ki kes kum kiba shah batbor, kiba shah jrong kti, kiba shah thombor ki khynnah, nalor kiwei de.
Katkum ka jingthoh ba la wah ha kane ka ophis, la pyni ba ki don haduh 3149 tylli ki jingjia ba la rejistar naduh u Nailar 2011 haduh July, 2025.
Ka jingshah thombor ha ïing ki don 1263 tylli, ki jingjia ba shah leh khlam akor ki don 1062, ki jingjia ba shah khlem akor ha jaka tei ki don 52 tylli, kiba shah batbor ki don 152 tylli bad kiwei ki kam thombor ki long 620, bad ha ki jaka sah pat ki don 23 tylli.
Ha kawei ka liang, ka kynhun ka National Women Commission (NCW) haka jingjurip ha ka 8 tarik Nailar 2025 ka la ihun ia ka jingpynbit pynbiang ka Ganesh Das Hospital ia ki kynthei khamtam kiba shah thombor ba lai phew jait.
Ka dkhot ka NCW ka kong Delina Khongdup ka la pynpaw ia ka jingitynnad ia ka rukom pynbiang kane ka hospital na ka bynta ban ai ka jingsumar ia ki kynthei khamtam kiba shah thombor.
Ka jylla ba ai sha ka kynthei hynrei jur ki kam thombor, ihun ka NCW ia ka jingpynbiang ka Ganesh Das Hospital
