Shillong: Ka Mawlai SC, ka la hiar ban mih madan da ka sur ialehkai kaba khlain, hadien baka lalah bakan pynliem noh ia ka Sawmer SC da 6-2, ha ka jingiakhun kaba ar jong ka Shillong Premier League, kaba la long hynne ka janmiet ha SSA Stadium, First Ground, Polo.
U Ricky Chyne (17’), Kevin Rymbai (18’, 57’P), Balajied Syiemlieh (23’) and Robert Khongriah (49’, 81’) ki long ki player kiba la ioh ban thep ia kine ki kol na ka bynta ka Mawlai, katba ia ki ar kol naka bynta ka Sawmer SC la ioh ban thep ia ki da u Enestar Malngiang (68’, 79’)
Kumban shu phaidien, ba ha ka samoi ialehkai u snem ba la dep, ka Mawlai SC ka la lah ba kan pynliem ar sien lynter ia ka Sawmer, kiba da long salit bha, kaba pynlong ia ka Mawlai ba kan jam shakhmat bad ban lah ban bat ia ka kyrdan kaba ar, katba ka Sawmer ka la ioh ban bat ia ka kyrdan kaba 8 bad lait na ka jingshah pynhiar na kane ka lympung jong ka SPL.
Haba phai biang sh aka jingiakhun, naduh kaba sdang ka Mawlai SC, ka la kyntiew bha ia la ka rukom ialehkai ka jong ka, katno tam lei lei hadien ba kham bun na ki snar ialehkai ka samoi kaba la dep, ki la mih na kane ka kynhun, kaba pynlong ia ka klob ryngkat u coach bah Hering Shangpliang ban hap ban thaw bd shna pynwandur thymmai biang ia la ka jong ka kynhun, kaba hynne hi ka janmiet, ka sur ialehkai jong ki player, kam lah ban khlem da pynkren briew.
Hpdeng kane ka sur ialehkai bha, ba ka pynlong ia ka Mawlai ba tang hapoh 23 minit, ka la lah ba kan tam shakhmat da lai kol bad ka la iai bteng ba kan tam shuh shuh da 5-0, ha shwa ba ka kynhun ialehkai ka Sawmer SC kan ioh ia ka kabu ksiar ban pynphai ia ka kol ba nyngkong.
Hadien kane, na ka liang u bah Hering bad u bah Arki Mylliemumlong (coach ka Sawmer SC) ki la wanrah ia ka jingkylla ha la ka jong ka kynhun ha ka dur jong ka jingbujli player, kaba hangne, marsien wanrah ia kum kine ki jingkylla, ba ka Sawmer SC ka la lah ba kan kham kyntiew ia la ka rukom ialehkai ka jong ka, katba na ka liang ka Mawlai SC pat ka la kham kynran dien bad ba la shu ialeh kat ba lah ban tehlakam ia ka bol.
Kumta ha kaba kut jong ka miet, ka Mawlai SC kan hun ka mynsiem ka jong ka ia ka rukom ialehkai ki player ha ka jingiakhun kaba nyngkong, katba na ka liang ka Sawmer SC, kan hap ba kan kham trei shitom lad aka thrang ban tbeh lem shakhmat na ki jingiakhun kiban dang wan ki jong ka.
Kumba ka long ia mynta hadien kane ka jingiakhun kaba mynta ka janmiet, kan nym don satia kano kano ka jingiakhun ha kine ki ar sngi kiban wan tad haduh ka 12 tarik u Nailar ha kaba ka Langsning FC kan mih madan ban iakhun pyrshah ia ka Mylliem kaban long ha ka por 5:30 janmiet, katba ia ka prokram iakhun ka Shillong Lajong FC pyrshah ia ka Rangdajied United FC ba la buh ban long lashai ka sngi Saitjain, la kynriah noh ia ka sha kiwei pat ka sngi namar ka jingdon ka prokam ialehkai ka Durand Cup 2025
Pynbam jem ka Mawlai 6-2 ia ka Sawmer ha ka SPL ka SSA
